नेकपा (माओवादी केन्द्र) का नेता शिवकुमार साह तेली पुनः बैंकिङ कसुर (चेक अनादर) मुद्दामा पक्राउ परेका छन् ।
पर्सा जिल्लाको सखुवा प्रसौनी गाउँपालिका–६ लखनपुर निवासी तेलीलाई प्रहरी टोलीले वीरगंज– श्रीपुरबाट पक्राउ गरेको जिल्ला प्रहरी कार्यालय पर्साले जनाएको छ । प्रहरी नायब उपरीक्षक (डीएसपी) किशोर लम्सालका अनुसार तेलीलाई ओम प्रकाश साह तेलीसँगको चेक अनादर मुद्दामा पक्राउ गरिएको हो ।
पहिलो म्यादपछि दोश्रो पटक पक्राउ
डीएसपी लम्सालका अनुसार नेता शिवकुमार साह तेलीले ओम प्रकाश साह तेलीसँग ३० लाख रुपैयाँ लिएर पटक–पटक झुक्याउने कार्य गरेको अभियोगमा जिल्ला अदालत पर्साले उनलाई पहिलो पटक ६ दिनको म्याद दिएको थियो । हाल पुनः दोश्रो पटक म्याद थप गरी अनुसन्धान भइरहेको प्रहरीले जनाएको छ ।
अघिल्लो उजुरी र चेक बाउन्सको घटना
यसअघि पनि तेलीलाई क्रान्ति गुप्तासहितका दुई व्यक्तिले दिएको जाहेरीका आधारमा प्रहरीले पक्राउ गरेको थियो । पीडितहरूका अनुसार तेलीले बैंक खातामा पर्याप्त रकम नभएको अवस्थामा पनि १० लाख र ६ लाख रुपैयाँका दुईवटा चेक दिएका थिए ।
तर ती चेक बैंकमा बाउन्स भएपछि पीडितहरूले जिल्ला प्रहरी कार्यालय पर्सामा उजुरी दर्ता गरेका थिए । सोही उजुरीका आधारमा उनलाई पहिलो पटक पक्राउ गरिएको थियो । प्रहरीका अनुसार बैंकिङ कसुर (चेक अनादर) सम्बन्धी मुद्दामा विस्तृत अनुसन्धान भइरहेको छ ।
जिल्ला प्रहरी कार्यालय पर्साले आवश्यक प्रमाण संकलन र पीडित पक्षका बयान लिएर मुद्दा सरकारी वकिलको कार्यालयमा पठाउने तयारी गरिरहेको जनाएको छ ।
सम्बन्धीत समाचार
नेकपा माओवादी केन्द्रका नेता शिवकुमार साह तेली बैंकिङ कसूर मुद्दामा पक्राउ
