घीउको ग्यालेनभित्र चरेस लुकाएर भारत तस्करी गर्ने दुई जनालाई पर्सामा प्रहरीले पक्राउ गरेको छ । पक्राउ पर्नेमा वीरगन्ज महानगरपालिका–१५ मुर्ली घर भएका २० वर्षीय रैयस अली र पोखरिया नगरपालिका–८ जगतपुर घर भएका ५५ वर्षीय मुनिलाल पटेल रहेका छन् ।
प्रहरीका अनुसार, पर्साको बिन्दबासिनी गाउँपालिका–२, गर्दौल चोकभन्दा पूर्व पोखरिया जाने सडकमा उनीहरूलाई लागू औषध चरेस २२ केजीसहित पक्राउ गरिएको हो ।
विशेष सूचनाका आधारमा बिहीबार बिहान इलाका प्रहरी कार्यालय पोखरियाबाट खटिएको टोलीले गर्दौल चोकको सडकमा दुईवटा कालो झोला बोकेर जाँदै गरेका अली र पटेललाई रोकेर जाँच गरेको थियो । जाँचका क्रममा उनीहरूले बोकेको कालो झोला भित्रको पानी खाने १० लिटरको ग्यालेन खोलेर हेर्दा, ग्यालेनको मुखमा घिउ राखिएको र घिउ मुनि चरेस लुकाइएको अवस्था भेटिएको थियो ।
पक्राउ परेको सामग्रीबारे प्रहरी नायब उपरीक्षक राजु कार्कीका अनुसार, अलीले बोकेको ग्यालेनबाट १० किलो ६०० ग्राम चरेस र पटेलको ग्यालेनबाट ११ किलो ४०० ग्राम चरेस बरामद भएको छ ।
चरेससहित नियन्त्रणमा लिइएका अली र पटेललाई थप अनुसन्धानका लागि प्रहरी हिरासतमा राखिएको छ ।
