वीरगञ्ज कारागारबाट एक जना कैदी फरार भएका छन् ।
कारागारको सुरक्षा घेरा तोड्दै पर्साको पोखरिया नगरपालिका–सतबरिया निवासी सुनिल साह फरार भएका हुन् । पर्साका प्रमुख जिल्ला अधिकारी (प्रजिअ) भोला दाहालले कैदी फरार भएको घटनाको पुष्टि गरेका छन् ।
घटनापछि जिल्ला प्रहरी कार्यालय पर्सा र सशस्त्र प्रहरी बलको टोली परिचालन गरी फरार कैदीको खोजी कार्य तीव्र पारिएको छ । वीरगंज भारतसँगको खुला सीमा नजिकै रहेकाले फरार कैदी भारततर्फ भाग्न सक्ने आशङ्कामा सीमावर्ती क्षेत्र तथा मुख्य नाकाहरूमा सुरक्षा निगरानी कडा पारिएको प्रहरीले जनाएको छ ।
साह कुन समयमा र कसरी कारागारबाट फरार हुन सफल भए भन्ने विषयमा प्रहरीले अनुसन्धान गरिरहेको छ । घटनाको वास्तविकता पत्ता लगाउन कारागार प्रशासनको भूमिकासमेत अनुसन्धानको दायरामा ल्याइएको जनाइएको छ । यसैबीच, घटनाबारे आन्तरिक छानबिन समेत अघि बढाइएको सहायक प्रमुख जिल्ला अधिकारी कृष्णप्रसाद चापागाईले जानकारी दिएका छन् ।
कडा सुरक्षा व्यवस्थाभित्र रहेको कारागारबाटै कैदी फरार भएपछि कारागारको सुरक्षा व्यवस्था, सुरक्षाकर्मीको निगरानी तथा प्रशासनिक जिम्मेवारीमाथि गम्भीर प्रश्न उठेको छ ।
