पर्सागढी नगरपालिका अन्तर्गत बढनियारमा दोस्रो साता पनी ‘घरदैलोमा डाक्टर’ कार्यक्रम सम्पन्न भएको छ ।
प्रभु हस्पिटल वीरगंजको सहकार्य तथा जुनतारा बचत सहकारी संस्थाको आयोजनामा सञ्चालन गरिएको उक्त कार्यक्रममा २ सय ५० जनाले निःशुल्क स्वास्थ्य सेवा प्राप्त गरेका छन् । कार्यक्रमअन्तर्गत १ सय ९० महिला र ६० पुरुष गरी कुल २ सय ५० जनाको स्वास्थ्य परीक्षण, सुगर कीटमार्फत मधुमेह परीक्षण तथा निःशुल्क औषधि वितरण गरिएको आयोजकले जनाएको छ ।
गरिब, विपन्न तथा स्वास्थ्य संस्थासम्म पुग्न नसक्ने बिरामीलाई घरदैलोमै पुगेर उपचार तथा स्वास्थ्य परामर्श दिने उद्देश्यले कार्यक्रम सञ्चालन गरिएको हो । स्थानीय बलिराम शुक्लाको समन्वय तथा जुनतारा बचत सहकारी संस्थाकी अध्यक्ष मञ्जु क्षेत्रीको अध्यक्षतामा सम्पन्न कार्यक्रममा प्रभु हस्पिटलकी सञ्चालिका एवं स्त्रीरोग विशेषज्ञ डा. लक्ष्मी थापा गुप्ताको प्रमुख आतिथ्यता रहेको थियो । कार्यक्रममा वरिष्ठ फिजिसियन डा. रवि रञ्जन साहले स्वास्थ्य परीक्षण तथा परामर्श प्रदान गरेका थिए ।
कार्यक्रममा विशेष पहल गरेका पत्रकार तथा सामाजिक अभियन्ता बलिराम शुक्लाले आगामी दिनमा पनि यस्ता सामाजिक तथा स्वास्थ्यसम्बन्धी कार्यक्रमलाई निरन्तरता दिन सहकार्य गर्ने प्रतिबद्धता व्यक्त गरेका थिए । कार्यक्रम प्रमुख दिलीप राज कार्कीले हस्पिटल केवल व्यावसायिक संस्थामात्र नभई सेवामुखी संस्था पनि हुनुपर्ने धारणा राख्दै यस्ता कार्यक्रमलाई निरन्तर सञ्चालन गरिने बताए ।
बिकट तथा दुर्गम क्षेत्रमा आयोजना गरिएको उक्त कार्यक्रममा अध्यक्ष मञ्जु क्षेत्रीले आवश्यक सहयोग र समन्वयमा निरन्तर साथ दिने प्रतिबद्धता जनाइन् । कार्यक्रमका क्रममा दीर्घरोगी, ज्येष्ठ नागरिक तथा महिलासम्बन्धी गम्भीर रोगका बिरामीलाई आगामी उपचारमा थप सहयोग र सेवा उपलब्ध गराइने प्रतिबद्धता डा. लक्ष्मी थापाले व्यक्त गरिन् ।
उनले प्रभु हस्पिटलले आगामी हप्ताहरूमा अन्य दुर्गम तथा पिछडिएका क्षेत्रमा समेत पुगेर ‘घरदैलोमा डाक्टर’ कार्यक्रमलाई निरन्तरता दिने जानकारी दिइन् ।
-1778246732.jpg)
