तराई क्षेत्रमा बढ्दो गर्मीसँगै विद्युत् आपूर्तिको समस्या झन् गम्भीर बन्दै गएको छ ।
नेपाल विद्युत् प्राधिकरणको वीरगंज वितरण केन्द्रको कमजोर व्यवस्थापन र लापरवाहीका कारण उपभोक्ताहरू दैनिक रूपमा सास्ती भोग्न बाध्य भएका छन् ।
स्थानीय उपभोक्ताहरूका अनुसार दैनिकजसो हुने विधुत् ट्रिपिङ, अनियमित आपूर्ति तथा रातभर दोहोरिने विद्युत् अवरोधका कारण वीरगंजदेखि ग्रामीण भेगसम्मका सेवाग्राही हैरान बनेका छन् । चर्को गर्मीका बीच पटक–पटक विद्युत् अवरुद्ध हुँदा सर्वसाधारणको दैनिक जीवन, उद्योग–व्यवसाय, अध्ययन तथा कार्यालय सञ्चालनमा समेत गम्भीर असर परेको छ ।
उपभोक्ताहरूले विधुत समस्याबारे जानकारी लिन प्राधिकरण शाखा कार्यालय वा जिम्मेवार अधिकारीलाई सम्पर्क गर्न खोज्दा फोन नउठ्ने गरेको गुनासो गरेका छन् । समस्या समाधान कहिले हुन्छ भन्नेबारे कुनै स्पष्ट जानकारी नदिइने गरेको उनीहरूको आरोप छ ।
रातभर हुने ट्रिपिङका कारण उद्योग–व्यवसायको उत्पादनसमेत प्रभावित भएको व्यवसायीहरूले बताएका छन् । त्यस्तै, कार्यालयका सम्पर्क नम्बरहरू कल डाइभर्ट गरिएको तथा जिम्मेवार अधिकारीहरू सम्पर्कविहीन बनेको आरोप पनि उपभोक्ताहरूले लगाएका छन् । शाखा प्रमुख विजय महतोले स्वास्थ्य समस्याको बहाना बनाएर जिम्मेवारीबाट पन्छिन खोजेको दाबीसमेत स्थानीयले गरेका छन् ।
विधुत प्राधिकरणप्रति जनआक्रोश बढ्दै गएको छ । अत्यधिक गर्मीको समयमा सेवा प्रभावकारी बनाउनुपर्नेमा उल्टै लापरवाही बढेको स्थानीयको भनाइ छ ।
स्थानीयहरूले सम्बन्धित निकाय, मधेस प्रदेश सरकार तथा सङ्घीय सरकारलाई तत्काल ध्यान दिई विद्युत् आपूर्ति व्यवस्था सुधार गर्न, ट्रिपिङ नियन्त्रण गर्न तथा जिम्मेवार अधिकारीलाई जवाफदेही बनाउन माग गरेका छन् ।
