वीरगंज महानगरपालिका–३१ र ३२ को क्षेत्रमा रहेको चिडियाखानाको अवस्था दयनीय बनेको छ । पर्यटकीय आकर्षणको केन्द्र बनाउने उद्देश्यले निर्माण गरिएको चिडियाखानामा पाँच वर्ष बितिसक्दा पनि सडक तथा आवश्यक पूर्वाधारमा अपेक्षित सुधार हुन नसकेको स्थानीयवासीले गुनासो गरेका छन् ।
कुनै समय आकर्षक पर्यटकीय गन्तव्य बन्ने अपेक्षा गरिएको चिडियाखानामा अहिले एउटा चरा हेर्नसमेत कठिन हुने अवस्था रहेको स्थानीयको भनाइ छ । मधेशकै नामसँग जोडिएको यस चिडियाखानाको वर्तमान अवस्था देख्दा निराशा लाग्ने गरेको उनीहरू बताउँछन् ।
स्थानीयवासी अर्जुन चौधरीका अनुसार बजेट विनियोजन र विकासका विषयमा चर्चा हुने बेला जनप्रतिनिधिहरू चिडियाखाना पुग्ने गरे पनि यसको वास्तविक अवस्था सुधार गर्न ठोस काम हुन सकेको छैन । उद्घाटन तथा शिलान्यासका बोर्ड र जीर्ण संरचनाबाहेक उल्लेखनीय विकास देख्न नसकिएको उहाँको गुनासो छ ।
चिडियाखानासम्म पुग्ने सडकसमेत व्यवस्थित नहुँदा सर्वसाधारणलाई आवतजावत गर्न कठिनाइ भइरहेको स्थानीयवासी बताउँछन् । पर्यटक आकर्षित गर्ने उद्देश्यले निर्माण गरिएको स्थलमा सडक, आवश्यक भौतिक पूर्वाधार तथा पशुपन्छीको व्यवस्थापनमा पर्याप्त ध्यान नदिइएको भन्दै उनीहरूले असन्तुष्टि व्यक्त गरेका छन् ।
स्थानीयवासीले चिडियाखानाको विकासका लागि विनियोजन भएको बजेट, हालसम्म सम्पन्न काम र बाँकी योजनाबारे सम्बन्धित निकायले स्पष्ट विवरण सार्वजनिक गर्नुपर्ने माग गरेका छन् । उनीहरूका अनुसार उद्घाटन, शिलान्यास र प्रचारप्रसारमा सीमित नभई चिडियाखानालाई व्यवस्थित बनाउन ठोस काम आवश्यक छ ।
चिडियाखानाको विकासको आशा ‘घण्टी’सँग
स्थानीय अर्जुन चौधरीले चिडियाखानाको विकास र व्यवस्थापनको सपना अब ‘घण्टी’ले पूरा गर्ने अपेक्षा व्यक्त गर्नुभएको छ । चिडियाखानालाई व्यवस्थित पर्यटकीय गन्तव्यका रूपमा विकास गर्न सम्बन्धित पक्षले प्रभावकारी योजना ल्याएर कार्यान्वयन गर्नुपर्ने उहाँको भनाइ छ ।
वीरगंज–३१ र ३२ को क्षेत्रमा रहेको चिडियाखानाको अवस्था कहिले सुध्रिने, सडक कहिले व्यवस्थित हुने र सर्वसाधारणले कहिले यसको वास्तविक लाभ लिन पाउने भन्ने प्रश्न अझै अनुत्तरित छ । स्थानीयवासीका गुनासो सम्बोधन गर्दै चिडियाखानाको विकासका लागि सम्बन्धित निकायले ठोस कदम चाल्नुपर्ने देखिन्छ ।
