सर्वोच्च अदालतको न्यायाधीशमा प्रस्तावित श्रीकान्त पौडेलले फरक मुद्दा व्यवस्थापन कार्यलाई आफ्नो प्रमुख प्राथमिकता रहने बताएका छन् । आइतबार बसेको संसदीय सुनुवाइ समितिको बैठकमा बोल्दै उनले न्यायिक प्रक्रिया पारदर्शी, पूर्वानुमानयोग्य र छिटोछरितो बनाउन फरक मुद्दा व्यवस्थापन प्रणालीमा आवश्यक परिमार्जन गरिने बताए ।
उनका अनुसार, उच्च अदालत र जिल्ला अदालतहरूमा लागू गरिएको वैज्ञानिक मुद्दा व्यवस्थापन पद्धतिलाई सर्वोच्च अदालतमा पनि विस्तार गर्न आवश्यक छ। उनले भने, “यो प्रणाली आइटी आधारित छ तर आवश्यक पूर्वाधार र सफ्टवेयर अझै अभावमा छन्। पूर्वाधार तयार गरी विस्तार गर्न सके न्यायपालिकाप्रति जनताको विश्वास बढ्नेछ ।"
पौडेलले इजलासको बहस समयको प्रभावकारी व्यवस्थापनलाई प्राथमिकतामा राख्ने बताए। उनले अनावश्यक पेशी स्थगनलाई निरुत्साहित गर्ने, जटिल मुद्दामा आवश्यक बहस सुनिश्चित गर्न बार एशोसिएशन लगायत सम्बन्धित निकायहरूसँग नियमित छलफलको पहल गर्ने प्रतिबद्धता व्यक्त गरे ।
त्यसैगरी, अनलाइन मुद्दा दर्ता प्रणालीको विस्तार र न्यायालयमा सूचना प्रविधिको विकासमा आफू प्रतिबद्ध रहने बताउँदै, न्यायिक सुशासनको प्रवर्द्धनमा सक्रिय भूमिका खेल्ने प्रतिवद्धता पनि व्यक्त गरे ।
