सर्लाही | सर्लाहीको लालबन्दीबाट सोमबार बिहान ठूलो परिमाणमा लागुऔषध गाँजा बरामद भएको छ ।
चुरेवर्ती क्षेत्रबाट गाँजा ल्याइँदै गरेको सुराकी पाएपछि इलाका प्रहरी कार्यालय लालबन्दीका प्रमुख इन्स्पेक्टर वीरेन्द्रसिंह जोहारीको नेतृत्वमा रातभर प्रहरी टोली तैनाथ गरिएको थियो । सोमबार बिहान ५ बजेतिर लालबन्दी नगरपालिका–६ स्थित शिव मन्दिरबाट ३८ किलो ८९० ग्राम गाँजा बरामद भएको हो ।
बरामद गाँजासँगै हरिवन नगरपालिका–१, पटौनाका ५५ वर्षीय बद्रीबहादुर श्रेष्ठलाई पक्राउ गरिएको छ । श्रेष्ठ अटोमा सवार थिए भने मोटरसाइकलमा रहेका अन्य पाँच व्यक्ति फरार रहेका छन् र उनीहरूको खोजी भइरहेको प्रहरीले जनाएको छ ।
लालबन्दी प्रहरीका अनुसार, गाँजा लखन्देही खोलाको भित्री बाटो हुँदै ल्याइँदै थियो। भित्री बाटोमा सूचना पाएपछि लालबन्दी–६ शिव मन्दिर आसपासमा बाटो ढुकेर प्रहरी टोली बसेको थियो। बरामद गाँजा अटो (प्रदेश–२–०३००१ ह ३२८ नम्बर) बाट एक पोका र मोटरसाइकल (ना ६० प ५५६ नम्बर) बाट छ पोका भएको छ ।
प्रहरीले घटनास्थलमा बरामद सामग्री र फरार व्यक्तिहरूको खोजी गरिरहेको जानकारी दिएको छ ।
