पृथ्वी राजमार्गअन्तर्गतको नागढुङ्गा–मलेखु सडक आयोजनाको काम सम्झौताअनुसार भएको भए तीन वर्षभित्रै सम्पन्न भइसकेको हुनुपर्ने थियो । तर हालसम्म ३७ प्रतिशत मात्रै काम सकिएकोले आयोजनालाई ६ महिनाको म्याद थप गरिएको छ ।
२०७९ पुस १५ गते तीन वर्षमा सम्पन्न गर्ने गरी सडक ठेक्का सम्झौता गरिएको थियो । मुग्लिन–नागढुङ्गा खण्डलाई तीन चरणमा विभाजन गरी बोलपत्र आह्वान गरिएको थियो । तेस्रो चरणको म्याद पुस १५ मा सकिएपछि निर्माण कम्पनीलाई १८३ दिन म्याद थप गरिएको छ ।
आयोजनाका इन्जिनियर विजय दरैका अनुसार, डिजाइनको तथ्यांकमा त्रुटि पर्दा सडकको नक्सांकन फरक परेको र काम समयमा सम्पन्न गर्न नसकिएको कारणले म्याद थप गरिएको हो । निर्माण कम्पनीले सडक निर्माण स्थल खाली नभएको, रुख–खम्बा सार्न समय नपाएको, निर्माण सामग्री सहज रूपमा उपलब्ध नभएको र सवारी साधनको उच्च चापजस्ता कारणले तोकिएको समयमा काम सम्पन्न गर्न नसकेको बताएको छ ।
हालसम्म सो खण्डमा करिब ३७.५ प्रतिशत काम मात्र सम्पन्न भएको छ । नौ किलोमिटरभन्दा बढी कालोपत्र गरिएको छ भने धादिङको चरौदी क्षेत्रमा कालोपत्र भइरहेको छ । फिस्लिङलगायत क्षेत्रमा कालोपत्रको तयारी भइरहेको छ । नाली, बेरियर, पुललगायतका अन्य कामहरू पनि जारी छन् । दैनिक १५० हाराहारी मजदुरले काम गरिरहेका छन् ।
सो खण्डमा कुल ३८.८६ किलोमिटर सडक पर्नेछ । मलेखु, बेनीघाट र मुग्लिन खण्डमा दुई लेनको सडक निर्माण हुनेछ भने चार लेनको सडक ७.२ किलोमिटरको बनाइनेछ । रमाइलो डाँडा, कुरिनटार, फिस्लिङ, चुम्लिङ, मझीमटार, चरौँदी र विशालटार क्षेत्रमा चार लेन सडक पर्नेछ । उकालो–ओरालो खण्डमा २.३ किलोमिटर ‘क्लाइम्बिङ’ मार्ग तीन लेनको हुनेछ । बाँकी सडक दुई लेनको बनाइने छ ।
शर्मा–जेडआइसिजीले उक्त खण्ड स्तरोन्नतिको ठेक्का ४ अर्ब ८० करोड ५९ लाख रुपैयाँमा पाएको छ । सडकका विभिन्न क्षेत्रमा कालोपत्र, नाला निर्माण, पहिरो रोकथाम, भित्तो काट्ने, पर्खाल बनाउने र सडक सुरक्षा सम्बन्धी कामहरू बाँकी छन् । यो सडक विश्व बैंकको सहयोगमा निर्माण हुँदैछ र काठमाडौँ प्रवेश गर्ने र बाहिरिने मुख्य नाकाको रूपमा रहेको छ ।
