पूर्वको व्यस्त विराटनगर भन्सारले माघ महिनामा लक्ष्यभन्दा बढी राजश्व संकलन गरेको छ । चालु आर्थिक वर्ष २०८२/०८३ अन्तर्गत माघ महिनामा कार्यालयले तोकेको लक्ष्यभन्दा बढी राजश्व असुली गर्न सफल भएको हो ।
कार्यालयले माघ महिनामा ३ अर्ब २३ करोड ६१ लाख रुपैयाँ राजश्व संकलन गर्ने लक्ष्य राखेको थियो । तर वास्तविक संकलन ३ अर्ब ३३ करोड ५ लाख रुपैयाँ पुगेको छ । यो लक्ष्यको तुलनामा १०२.९४ प्रतिशत उपलब्धि हो । चालु आर्थिक वर्षका पछिल्ला सात महिनामध्ये यो सबैभन्दा उच्च उपलब्धि रहेको कार्यालय प्रमुख उमेश श्रेष्ठले जानकारी दिए ।
उनका अनुसार अनलाइन भ्यालुएसन प्रणाली पूर्ण रूपमा कार्यान्वयन गरेपछि राजश्व संकलनमा उल्लेखनीय सुधार देखिएको छ । प्रविधिमा आधारित प्रणालीले राजश्व चुहावट नियन्त्रण गर्न सहयोग पुगेको उनले बताए । अनलाइन प्रणाली लागू भएपछि पारदर्शिता बढेको र त्यसको प्रत्यक्ष प्रभाव राजश्व असुलीमा देखिएको उनको भनाइ छ ।
चालु आर्थिक वर्षको सात महिनाको समग्र तथ्यांक हेर्दा कार्यालयले लक्ष्यको ८२.९ प्रतिशत राजश्व संकलन गरिसकेको छ । साउनदेखि माघसम्म २३ अर्ब ५५ करोड ७६ लाख रुपैयाँ राजश्व संकलन गर्ने लक्ष्य राखिएकोमा हालसम्म १९ अर्ब ३१ करोड ९१ लाख रुपैयाँ संकलन भइसकेको छ ।
गत वर्षको यही अवधिमा ८१ प्रतिशत मात्रै राजश्व संकलन भएको थियो । अघिल्लो वर्षको तुलनामा समग्र राजश्व संकलन सुधारिएको र यो उत्साहजनक रहेको प्रमुख श्रेष्ठले बताए ।
विराटनगर भन्सारबाट कोइला तथा औद्योगिक कच्चा पदार्थको आयात बढेपछि लक्षित राजश्व संकलन गर्न सहज भएको कार्यालयले जनाएको छ । भन्सार महसुल, कृषि सुधार शुल्क, अन्तःशुल्क, सडक सुधार दस्तुर, कोइला इन्धनसम्बन्धी हरित कर तथा मूल्य अभिवृद्धि कर (भ्याट) शीर्षकबाट राजश्व संकलन हुँदै आएको छ ।
भन्सार प्रशासनको प्रविधिमैत्री सुधार र निगरानी कडाइका कारण आगामी महिनाहरूमा पनि राजश्व संकलन थप प्रभावकारी हुने अपेक्षा गरिएको छ ।
