नेपाल दूरसञ्चार कम्पनी लिमिटेड (नेपाल टेलिकम) ले गत आर्थिक वर्ष २०८२/८३ को चौथो त्रैमासमा उल्लेख्य नाफा वृद्धि गरेको छ । कम्पनीको अपरिष्कृत वित्तीय विवरणअनुसार वैशाखदेखि असार मसान्तसम्म टेलिकमले ४ अर्ब २० करोड २४ लाख ५२ हजार रुपैयाँ खुद नाफा कमाएको छ ।
अघिल्लो आर्थिक वर्ष २०८१/८२ को सोही अवधिमा कम्पनीले १ अर्ब २२ करोड ४८ लाख ४ हजार रुपैयाँ नाफा कमाएको थियो । यस आधारमा एक वर्षको अवधिमा चौथो त्रैमासिक नाफा करिब ३ अर्ब रुपैयाँले बढेको छ । तेस्रो त्रैमाससम्म ३ अर्ब १४ करोड ८० लाख १८ हजार रुपैयाँ नाफा कमाएको टेलिकमले चौथो त्रैमासमा मात्रै थप १ अर्ब ५ करोड ४४ लाख ३४ हजार रुपैयाँ नाफा बढाएको हो ।
टेलिकमका प्रवक्ता कमल लामिछानेका अनुसार पछिल्लो समय ‘फाइबर टु द होम’ (एफटीटीएच) र जीएसएम डाटाको खपत बढेसँगै कम्पनीको आम्दानी वृद्धि भएको हो । भ्वाइस सेवाभन्दा डाटा खपत बढ्नुका साथै सञ्चालन खर्च घटेका कारण समग्र नाफामा सुधार आएको उनले बताए । कम्पनीले विज्ञापन, प्रायोजन, सेवा सञ्चालन तथा मर्मतसम्भारलगायतका खर्च कटौतीबाट समेत उल्लेख्य बचत गरेको जनाएको छ । गत आर्थिक वर्षमा विज्ञापन तथा प्रायोजनका खर्च कटौतीबाट मात्रै करिब १० देखि १५ करोड रुपैयाँ बचत भएको टेलिकमको भनाइ छ ।
गत आर्थिक वर्षको चौथो त्रैमाससम्म टेलिकमको कुल सञ्चालन आय ३४ अर्ब ९५ करोड ४ लाख रुपैयाँ पुगेको छ । अघिल्लो आर्थिक वर्षको सोही अवधिमा यस्तो आय ३३ अर्ब ८९ करोड ४५ लाख रुपैयाँ थियो। सञ्चालन आय १ अर्ब ५ करोड ५९ लाख रुपैयाँ अर्थात् ३.१२ प्रतिशतले बढेको हो । त्यस्तै, कम्पनीको कुल आय ३९ अर्ब १९ करोड ९६ लाख रुपैयाँ पुगेको छ । अघिल्लो आर्थिक वर्षमा कुल आय ३८ अर्ब १८ करोड ८१ लाख रुपैयाँ थियो। कुल आय १ अर्ब १ करोड १५ लाख रुपैयाँ अर्थात् २.६५ प्रतिशतले वृद्धि भएको हो ।
टेलिकमले गत आर्थिक वर्षभरि ८ अर्ब ८६ करोड ४६ लाख रुपैयाँ खुद मुनाफा कमाएको छ । अघिल्लो आर्थिक वर्षको ६ अर्ब ६७ लाख रुपैयाँको तुलनामा खुद मुनाफा २ अर्ब ८५ करोड ७९ लाख रुपैयाँ अर्थात् ४७.५८ प्रतिशतले बढेको हो । समीक्षा अवधिमा करअघिको मुनाफा पनि बढेर १३ अर्ब २६ करोड ४७ लाख रुपैयाँ पुगेको छ । अघिल्लो आर्थिक वर्षमा यस्तो मुनाफा ९ अर्ब ८५ करोड २ लाख रुपैयाँ थियो ।
मुख्य दूरसञ्चार सेवाबाट हुने आम्दानीमा वृद्धि हुनु टेलिकमको नाफा बढ्नुको प्रमुख कारण रहेको कम्पनीले जनाएको छ । विशेषगरी जीएसएम सेवातर्फको राजस्व अघिल्लो आर्थिक वर्षको तुलनामा ६४ करोड ५४ लाख रुपैयाँ अर्थात् २.२८ प्रतिशतले बढेको छ ।
कम्पनीले सेवा सुधार र प्रशासनिक प्रक्रियालाई डिजिटल बनाउने कामलाई समेत तीव्रता दिएको जनाएको छ । ‘वान टाइम केवाईसी’, अनलाइन सेवा, ई–सिम वितरण, गुनासो व्यवस्थापन, हराएको सिम पुनःप्राप्ति तथा स्वामित्व हस्तान्तरणलगायतका सेवा अनलाइनबाट उपलब्ध गराइएको छ ।
त्यस्तै, ‘पे–एज–यू–गो’ प्रणाली लागू भएपछि डाटा प्याकेज सकिएपछि ग्राहकको ब्यालेन्स स्वतः काटिने अवस्थालाई विकल्पसहित व्यवस्थित गरिएको कम्पनीले जनाएको छ । ४जी सेवाको पहुँच तथा गुणस्तर सुधारका लागि थप फ्रिक्वेन्सी उपलब्ध गराउनेलगायतका नीतिगत पहलसमेत भएका छन् ।
