प्रथम थारू माघि साँस्कृतिक महोत्सव–२०८२ को दोस्रो तथा अन्तिम दिन नया कदम नेपालद्वारा आयोजना गरिएको निःशुल्क स्वास्थ्य जाँच तथा उपचार शिविरमा सयौं स्थानीय नागरिक लाभान्वित भएका छन् ।
बिहानैदेखि सुरु भएको शिविरमा रक्तचाप, सुगर तथा तौल (वजन) मापन, सामान्य स्वास्थ्य परीक्षण, आवश्यक चिकित्सकीय परामर्श र निःशुल्क औषधि वितरण लगायतका सेवाहरू प्रदान गरिएको थियो । स्वास्थ्य सेवाप्रति स्थानीय समुदायले देखाएको उत्साहपूर्ण सहभागिताले शिविर प्रभावकारी बनेको आयोजक संस्थाले जनाएको छ ।
नया कदम नेपालका स्वास्थ्यकर्मी तथा स्वयंसेवकहरूको टोलीले बिहानदेखि साँझसम्म निरन्तर सेवा प्रदान गर्दै स्वास्थ्य परीक्षण र उपचारमा सक्रिय भूमिका निर्वाह गरेका थिए ।
संस्थाका प्रतिनिधिहरूका अनुसार महोत्सवको सांस्कृतिक पक्षसँगै स्थानीय बासिन्दाको स्वास्थ्य सुरक्षालाई प्राथमिकतामा राख्दै शिविर सञ्चालन गरिएको हो । आगामी दिनहरूमा पनि यस्ता समुदायमुखी सामाजिक तथा स्वास्थ्यसम्बन्धी कार्यक्रमलाई निरन्तरता दिने प्रतिबद्धता संस्थाले व्यक्त गरेको छ ।
शिविर सफल बनाउन प्रत्यक्ष तथा अप्रत्यक्ष रूपमा सहयोग गर्ने सबैप्रति नया कदम नेपालले आभार व्यक्त गर्दै “हाम्रो लक्ष्य स्वास्थ्य, सेवा र समाज” भन्ने मूल मन्त्रका साथ समाजसेवामा निरन्तर सक्रिय रहने जनाएको छ ।
