बाराको जितपुर सिमरा उपमहानगरपालिकामा प्रहरीले ठूलो परिमाणमा लागुऔषध गाँजा नियन्त्रणमा लिएको छ ।
जिल्ला प्रहरी कार्यालय बाराका अनुसार मनहरीबाट कलैयातर्फ गइरहेको बीए सी २३४३ नम्बरको “नेपाली योद्धा” पिकअप भ्यान जाँच गर्दा लुकाइछिपाइ ल्याइएको २०३ केजी ८५० ग्राम गाँजा बरामद भएको हो ।
प्रहरीले भन्यो, “जितपुर सिमरा उपमहानगरपालिका–१८ बडर्वा क्षेत्र अन्तर्गत पिलुवा–कलैया भित्री सडक खण्डमा शङ्कास्पद गतिविधि देखिएपछि पिकअप भ्यान रोकी जाँच गरिएको थियो । गाडीको पछिल्लो भागमा विशेष रूपमा बनाइएको फल्स बटममा २० पोका गाँजा लुकाइएको फेला परेको छ ।”
बरामद गरिएको गाँजा सँगै पिकअप चालक मकवानपुर जिल्लाको मनहरी गाउँपालिका–६ का २४ वर्षीय निशान बहादुर सुनचुरीलाई नियन्त्रणमा लिइएको छ । उनलाई थप अनुसन्धान र कानुनी प्रक्रियाका लागि इलाका प्रहरी कार्यालय सिमरामा पठाइएको छ ।
प्रहरीले पिकअप गाडी हाल प्रहरी चौकी जैतापुरको नियन्त्रणमा राखेको बताएको छ भने घटनाबारे थप अनुसन्धान जारी रहेको छ ।
-Recovered@1x_1-1792306880.jpg){kind=logo}
-Recovered@1x_1-1792308710.jpg){kind=logo}
