डडेल्धुरा जिल्लामा सामाजिक सुरक्षा भत्ता बुझ्ने उमेर पुगेपछि दुई व्यक्तिले नागरिकताको प्रमाणपत्र प्राप्त गरेका छन् । जिल्ला प्रशासन कार्यालय डडेल्धुराले बुधबार ७४ र ७० वर्ष उमेरका दुई जनालाई नागरिकता प्रदान गरेको हो ।
सहायक प्रमुख जिल्ला अधिकारी अमरबहादुर ओलीले उनीहरूलाई नागरिकताको प्रमाणपत्र हस्तान्तरण गरेका हुन् । लामो समयदेखि नागरिकता अभावमा राज्यबाट प्राप्त हुने सेवा–सुविधाबाट वञ्चित हुँदै आएका उनीहरू नागरिकता पाएपछि निकै खुसी भएका छन् ।
सोलुखुम्बुबाट आएर करिब चार दशकदेखि डडेल्धुरामा बसोबास गर्दै आएका एनबी तामाङले नागरिकता प्राप्त गरेका छन् । २००८ चैत ३० गते जन्मिएका तामाङ हाल अमरगढी नगरपालिका–५ मा बस्दै आएका छन् । २०३५ सालमा डडेल्धुरा आएका उनले विभिन्न ठाउँमा मजदुरी गर्दै जीवन निर्वाह गर्दै आएका थिए । नागरिकतामा पनि उनको स्थायी ठेगाना अमरगढी–५, डडेल्धुरा नै उल्लेख गरिएको छ ।
नागरिकता पाएपछि आफू पनि आधिकारिक रूपमा नेपाली नागरिक बनेको महसुस भएको तामाङले बताए । ‘पहिले नागरिकताको आवश्यकता कति महत्त्वपूर्ण हुन्छ भन्ने थाहा भएन,’ उनले भने, ‘अब बल्ल वृद्धभत्ता पाइन्छ भन्ने थाहा पाएपछि नागरिकता बनाएको हुँ ।’ उनकी श्रीमतीको निधन भइसकेको छ भने सन्तान छैनन् ।
यस्तै, गन्यापधुरा गाउँपालिका–३ का गगनसिंह खड्काले पनि नागरिकता प्राप्त गरेका छन् । २०१२ माघ १५ गते जन्मिएका खड्का २०२८ सालमा भारत गएका थिए । उनले करिब ५६ वर्ष भारतका विभिन्न सहरमा मजदुरी गर्दै जीवन बिताएका थिए । पछिल्लो समय गुजरातमा कार्यरत रहेका उनी कम्पनी सरेपछि नेपाल फर्किएका हुन् ।
नेपाल फर्किएको एक सातामात्रै भएको बताउँदै खड्काले स्थानीयको सुझावपछि नागरिकता बनाउन जिल्ला प्रशासन आएको बताए । ‘भारतमा हुँदा नागरिकताको खासै आवश्यकता परेन,’ उनले भने, ‘नेपाल आएपछि बुढेसकालमा भत्ता पाइन्छ भनेर नागरिकता बनाएको हुँ।’ खड्का अविवाहित हुन् ।
सहायक प्रमुख जिल्ला अधिकारी ओलीले नागरिकता प्राप्त गर्नु प्रत्येक नागरिकको संवैधानिक अधिकार भएको उल्लेख गर्दै कार्यालय यसप्रति प्रतिबद्ध रहेको बताए । ‘लामो समय नागरिकताविहीन भएर बस्नुपरेका नागरिकलाई कानुनी प्रक्रिया पूरा गरी नागरिकता प्रदान गरिएको हो,’ उनले भने ।
वंशजका आधारमा नागरिकता पाएसँगै उनीहरू सामाजिक सुरक्षा भत्ता, स्वास्थ्य सेवा तथा अन्य सरकारी सेवा–सुविधाको पहुँचमा पुगेका छन् ।
.jpg-2-1769587845.jpg)
