पछिल्लो समय बढ्दो लागूऔषध दुर्व्यसनका कारण मानसिक तथा पारिवारिक समस्या समेत बढ्दै गएको एक कार्यक्रमका सहभागीहरूले बताएका छन् ।
मंगलबार राप्ती आयुर्वेद चिकित्सालय तुलसीपुर को आयोजनामा सम्पन्न मानसिक स्वास्थ्य प्रवर्द्धनका लागि योग तथा ध्यान कार्यक्रममा बोल्ने वक्ताहरूले लागूऔषध दुर्व्यसनले व्यक्ति, परिवार र समाजमा नकारात्मक असर पारिरहेको बताएका हुन् ।
निर्णय पुनर्स्थापना केन्द्र को समन्वयमा आयोजित मानसिक समस्या व्यवस्थापनसम्बन्धी दुई दिने योग तथा ध्यान शिविर सोमबार र मंगलबार घोराहीमा सम्पन्न भएको हो । शिविरमा पुनर्स्थापना केन्द्रमा उपचाररत पूर्व दुर्व्यसनी तथा उपचारार्थीहरूको सहभागिता रहेको थियो ।
संस्थाका कार्यालय प्रमुख गणेश ओलीले उपचाररत व्यक्तिहरूलाई मानसिक रूपमा सबल बनाउने, समाजमा पुनर्स्थापना गर्न सहयोग पुर्याउने तथा उनीहरूको क्षमता विकास गर्ने उद्देश्यले शिविर सञ्चालन गरिएको जानकारी दिनुभयो ।
कार्यक्रममा स्वास्थ्य कार्यालय दाङ का प्रमुख टिबी गुरुङले मानसिक समस्या व्यवस्थापनका विषयमा प्रशिक्षण दिनुभएको थियो । त्यसैगरी राप्ती आयुर्वेद चिकित्सालय तुलसीपुर का प्रमुख डा. मदनकुमार बिसीले स्वस्थ जीवनशैली तथा आहार–विहारका विषयमा प्रशिक्षण दिनुभएको थियो ।
यस्तै, मोटिभेटर स्पिकर विनोद केसी तथा स्वास्थ्य मन्त्रालय लुम्बिनी प्रदेशका शाखा अधिकृत सरोज भण्डारीले सकारात्मक सोच, चिन्तन र व्यवहार सम्बन्धी प्रशिक्षण दिनुभएको थियो ।
योग प्रशिक्षक निमानन्द रिजाल र अञ्जु रेग्मी न्यौपानेले सहभागीहरूलाई योग तथा ध्यान अभ्यास गराउनुभएको कार्यक्रममा संस्थाका उपाध्यक्ष विष्णु ओलीको अध्यक्षता तथा स्वास्थ्य कार्यालय दाङका प्रमुख टिबी गुरुङको प्रमुख आतिथ्यता रहेको थियो ।
कार्यक्रमको स्वागत मन्तव्य राप्ती आयुर्वेद चिकित्सालय तुलसीपुर का प्रमुख डा. मदनकुमार बिसीले राख्नुभएको थियो भने सञ्चालन निर्णय पुनर्स्थापना केन्द्रका कार्यालय प्रमुख गणेश ओलीले गर्नुभएको थियो ।
