सरकारले सार्वजनिक सेवा प्रवाहलाई नागरिकको घरदैलोमै पुर्याउने उद्देश्यले सुरु गरेको सरकारी ‘कुरियर’ सेवा देशका ६० जिल्लामा विस्तार भएको छ । हुलाक सेवा विभागले राहदानी, सवारी चालक अनुमतिपत्र (लाइसेन्स), शैक्षिक प्रमाणपत्रलगायत सरकारी कागजात घरमै पुर्याउने प्रणालीलाई विस्तार गर्दै सेवा प्रवाहलाई आधुनिक र डिजिटल बनाउने प्रयास तीव्र पारेको जनाएको छ ।
हुलाक सेवा विभागकी महानिर्देशक मनमाया भट्टराई पँगेनीका अनुसार सुरुका चरणमा केही जिल्लामा चुनौती देखिए पनि हाल अधिकांश जिल्लामा सेवा प्रभावकारी रूपमा सञ्चालन भइरहेको छ । उनका अनुसार तल्लो तहसम्म संयन्त्र परिचालन गरेर सेवा विस्तार गरिएको छ र नागरिकले सरकारी कागजात लिन कार्यालय धाउनुपर्ने बाध्यता क्रमशः घट्दै गएको छ ।
विभागका अनुसार सरकारी कुरियर सेवा सुरु भएयता हालसम्म २८ हजार १६९ वटा राहदानी सम्बन्धित जिल्लासम्म ढुवानी गरिएको छ । तीमध्ये १ हजार ६३५ वटा राहदानी सेवाग्राहीको घरमै पुगेर वितरण गरिएको छ । जिल्ला प्रशासन कार्यालयमा आवेदनकै क्रममा सेवाग्राहीको ठेगाना संकलन गरिन थालेपछि वितरण प्रक्रिया थप सहज बनेको विभागले जनाएको छ ।
यातायात सेवामा पनि हुलाक प्रणालीको प्रयोग विस्तार गरिएको छ । हालसम्म ४ लाख ७० हजार ८८१ वटा सवारी चालक अनुमतिपत्र सम्बन्धित यातायात कार्यालयमा पठाइएको छ भने ६७१ वटा लाइसेन्स घरमै पुर्याएर वितरण गरिएको विभागले जनाएको छ ।
शिक्षा र स्वास्थ्य क्षेत्रमा पनि हुलाक सेवाको सहकार्य विस्तार भइरहेको छ । हालसम्म २६० वटा शैक्षिक प्रमाणपत्र वितरण भइसकेका छन् भने राष्ट्रिय जनस्वास्थ्य प्रयोगशालासँगको सहकार्यमा ४८८ वटा प्रयोगशाला नमुना ढुवानी गरिएको छ । सुर्खेत, बाँके र काठमाडौँबाट यो सेवा सञ्चालनमा ल्याइएको हो ।
नेपाल टेलिकमसँग सहकार्य गरी सिमकार्ड घरमै पुर्याउने सेवा सुरु गर्ने तयारी भइरहेको विभागले जनाएको छ । त्यस्तै, मध्यपश्चिम विश्वविद्यालयसँग प्रश्नपत्र, उत्तरपुस्तिका तथा प्रमाणपत्र ढुवानीको कार्य सुरु भइसकेको छ भने नेपाल खुला विश्वविद्यालयसँग पनि सहकार्यबारे छलफल भइरहेको छ ।
राष्ट्रिय स्वास्थ्य, शिक्षा तथा सूचना केन्द्रसँग डाँक ढुवानीसम्बन्धी सम्झौताको प्रारम्भिक मस्यौदा तयार भएको र नेपाल टेलिकमका सामग्री पनि हुलाकमार्फत ढुवानी गर्ने विषयमा छलफल भइरहेको विभागले जनाएको छ । साथै, निजी क्षेत्रका सामग्री ढुवानी गर्ने विषयमा पनि छलफल अघि बढाइएको छ ।
अन्तरराष्ट्रिय कुरियर सेवातर्फ पनि विस्तारको तयारी भइरहेको छ। हवाई सेवा प्रदायक कम्पनीहरूसँग समन्वय गरी थप देशमा हुलाक पहुँच विस्तार गर्ने योजना रहेको विभागले जनाएको छ । प्रणालीगत सुधारअन्तर्गत राहदानी विभागसँग प्रणाली अन्तरआबद्धता, महालेखा नियन्त्रक कार्यालयसँग प्रणाली एकीकरण तथा पोस्टल ट्र्याकिङ सिस्टम सुधार कार्य अघि बढाइएको छ ।
सरकारले परम्परागत हुलाक सेवालाई आधुनिक सेवा वितरण प्रणालीमा रूपान्तरण गर्ने प्रयास गरे पनि सेवा अझै प्रारम्भिक चरणमै रहेको जनाइएको छ । वितरणको गति, पारदर्शिता र विश्वसनीयतामा सुधार आवश्यक भए पनि नागरिकलाई घरमै सेवा पुर्याउने अवधारणाले प्रशासनिक पहुँचलाई सहज बनाउने संकेत गरेको छ ।
