वीरगंज उद्योग वाणिज्य संघले वीरगंज महानगरपालिकाका नवनियुक्त प्रमुख प्रशासकीय अधिकृत बसन्तबहादुर बोहरासँग भेटघाट तथा समसामयिक विषयमा छलफल गरेको छ ।
संघको सभाकक्षमा आयोजित कार्यक्रममा संघका अध्यक्ष हरि गौतमले प्रमुख प्रशासकीय अधिकृत बोहरालाई स्वागत गर्दै वीरगंजको व्यावसायिक तथा आर्थिक गतिविधिसँग सम्बन्धित विभिन्न विषयमा ध्यानाकर्षण गराएका थिए । अध्यक्ष गौतमले राजमार्ग क्षेत्रमा सवारी कर संकलनको प्रक्रिया, कवाडी व्यवसायको नाममा भइरहेको अवैध कारोबार नियन्त्रण, महानगरपालिकाले भत्काएका घरका घरधनीबाट घरपटी कर लिने वा नलिने विषयलगायत व्यवसायी तथा सर्वसाधारणसँग प्रत्यक्ष सरोकार राख्ने मुद्दामा स्पष्ट नीति आवश्यक रहेको बताए ।
उनले व्यवसायमैत्री वातावरण निर्माण, सुशासन प्रवर्द्धन तथा निजी क्षेत्रका समस्याको समयमै समाधानका लागि महानगरपालिकाले प्रभावकारी भूमिका निर्वाह गर्नुपर्नेमा जोड दिए । कार्यक्रममा प्रमुख प्रशासकीय अधिकृत बसन्तबहादुर बोहराले संघका पदाधिकारीले उठाएका विषयलाई गम्भीरतापूर्वक लिएको बताउँदै कानुन तथा प्रचलित व्यवस्थाअनुसार समस्याको समाधान गर्न महानगरपालिका सकारात्मक रूपमा अघि बढ्ने प्रतिबद्धता व्यक्त गरे।
उनले निजी क्षेत्रसँग सहकार्य गर्दै वीरगञ्जको विकास, सुशासन र व्यवसायमैत्री वातावरण निर्माणमा महानगरपालिका सदैव प्रतिबद्ध रहने धारणा पनि राखे ।
कार्यक्रममा संघका निवर्तमान अध्यक्ष अनिल अग्रवाल, वरिष्ठ उपाध्यक्ष माधव राजपाल, महासचिव शिवजी प्रसाद साह, कोषाध्यक्ष अनोज रूँगटा, सहकोषाध्यक्ष निरज अग्रवाल, सचिव प्रेमचन्द्र गोयल, सहसचिव नरेश टिबडेवाललगायत पदाधिकारीहरूले पनि आ-आफ्ना धारणा राख्दै व्यवसायीका समस्या समाधानका लागि महानगरपालिका र निजी क्षेत्रबीच प्रभावकारी समन्वय आवश्यक रहेको बताएका थिए ।
