वीरगंजमा युवा भेला सम्पन्न, आगामी निर्वाचनमा सुधिर पटेललाई मेयरको उम्मेदवार बनाउने युवाहरूको घोषणा

स्थानीय

Home
स्थानीय
वीरगंजमा युवा भेला सम्पन्न, आगामी निर्वाचनमा सुधिर पटेललाई मेयरको उम्मेदवार बनाउने युवाहरूको घोषणा

वीरगंजमा युवा भेला सम्पन्न, आगामी निर्वाचनमा सुधिर पटेललाई मेयरको उम्मेदवार बनाउने युवाहरूको घोषणा

वीरगंजमा युवा नेता रन्दिप श्रीवास्तवको अध्यक्षतामा विशेष युवा भेला सम्पन्न भएको छ । त्रिशाला होटलमा आयोजित भेलामा वीरगञ्जका २२० भन्दा बढी युवाको सहभागिता रहेको आयोजकले जनाएको छ ।

आगामी २०८४ सालको स्थानीय तह निर्वाचनलाई लक्षित गरी आयोजित भेलाको उद्देश्य युवापुस्तालाई राजनीतिक रूपमा सक्रिय बनाउनु र समाजको नेतृत्वमा अग्रसर गराउनु रहेको बताइएको छ ।

भेलालाई सम्बोधन गर्ने वक्ताहरूले आगामी निर्वाचनमा समाजको सुख–दुःखमा निरन्तर साथ दिने, जनउत्तरदायी र इमानदार प्रतिनिधि चयन गर्नुपर्नेमा जोड दिएका थिए । उनीहरूले निर्वाचनमा ठूलो रकम खर्च गरेर आउने ठेकेदार वा व्यापारी पृष्ठभूमिका उम्मेदवार निर्वाचित भएपछि जनहितभन्दा आफ्नो लगानी उठाउने प्रवृत्ति देखिन सक्ने भन्दै त्यस्ता प्रवृत्तिलाई निरुत्साहित गर्नुपर्ने धारणा व्यक्त गरेका थिए ।

भेलाले आगामी स्थानीय तह निर्वाचनका लागि वीरगञ्ज महानगरपालिकाको मेयर पदमा सुधिर पटेललाई अगाडि सार्ने सर्वसम्मत निर्णय गरेको आयोजकले जनाएको छ । सहभागी युवाहरूले आगामी निर्वाचनमा पटेललाई युवाको समर्थनसहित चुनावी मैदानमा उतार्ने र विजयी गराउन सक्रिय रूपमा लाग्ने प्रतिबद्धता व्यक्त गरेका छन् ।