बाराको जीतपुरसिमरा उपमहानगरपालिका–७ स्थित टेढा रोडमा यात्रु चढाउने विषयमा भएको विवादले उग्र रूप लिँदा दुई अटोचालकबीच झडप भएको छ ।
घटनामा एक चालकको कान चुँडिएको छ भने प्रहरीले दुवै पक्षलाई नियन्त्रणमा लिएर अनुसन्धान अघि बढाएको छ । आइतबार भएको घटनामा घाइते हुने अटोचालक गोविन्द बस्नेत रहेको इलाका प्रहरी कार्यालय जीतपुरले जनाएको छ । उनको एउटा कान चुँडिनुका साथै शरीरका विभिन्न भागमा चोट लागेको छ । प्रारम्भिक उपचारपछि उनलाई थप उपचारका लागि अस्पताल पठाइएको प्रहरीले जनाएको छ ।
प्रत्यक्षदर्शीका अनुसार टेढा रोडमा यात्रु चढाउने विषयमा अटोचालकहरूबीच विवाद सुरु भएको थियो । सामान्य भनाभनपछि विवाद हात हालाहालमा परिणत भएको थियो । स्थानीयका अनुसार झडपका क्रममा अर्का चालक रामबहादुर श्रेष्ठले धकेल्दा गोविन्द बस्नेत नजिकै रहेको मोटरसाइकलमा ठोक्किएका थिए । मोटरसाइकलको धारिलो भाग लाग्दा उनको कान चुँडिएको हो ।
घटनापछि उनी रगताम्मे अवस्थामा ढलेका थिए भने स्थानीयले तत्काल उद्धार गरी उपचारका लागि अस्पताल पुर्याएका थिए । सूचना पाएलगत्तै इलाका प्रहरी कार्यालय जीतपुरबाट प्रहरी टोली घटनास्थल पुगेको थियो । प्रहरीले दुवै चालकलाई नियन्त्रणमा लिनुका साथै उनीहरूले चलाएका अटोसमेत नियन्त्रणमा लिएको जनाएको छ । प्रहरीका अनुसार घटनाबारे थप अनुसन्धान भइरहेको छ । टेढा रोड क्षेत्रमा पर्साका विभिन्न ग्रामीण गन्तव्यका लागि अटो सेवा सञ्चालन हुँदै आएको छ । तर यात्रु तान्ने प्रतिस्पर्धा र नियमविपरीत गतिविधिका कारण यस्ता विवाद बारम्बार दोहोरिने गरेको स्थानीयको भनाइ छ ।
स्थानीयले सार्वजनिक यातायात व्यवस्थापनमा कडाइ गर्न, तोकिएको स्थानबाट मात्र यात्रु चढाउने व्यवस्था लागू गर्न र चालक अनुशासन कायम गर्न सम्बन्धित निकायसँग माग गरेका छन् ।
-Recovered@1x_1-1792306880.jpg){kind=logo}
-Recovered@1x_1-1792308710.jpg){kind=logo}
