आर्थिक वर्षको अन्तिम दिन रौतहटको गरुडा नगरपालिकामा सरकारी कार्यालय बन्द राखेर निजी निवासबाट योजनाको भुक्तानी प्रक्रिया सञ्चालन गरिएको विषय सार्वजनिक भएपछि प्रमुख प्रशासकीय अधिकृतसहित केही कर्मचारी प्रहरी नियन्त्रणमा परेका छन् ।
उक्त घटनाले स्थानीय तहको वित्तीय पारदर्शिता तथा प्रशासनिक जवाफदेहितामाथि गम्भीर प्रश्न उठाएको छ । प्रहरीका अनुसार नगरपालिकाको कार्यालयमा बिहानै ताल्चा लगाइएपछि प्रमुख प्रशासकीय अधिकृत नीलमकुमार न्यौपाने कार्यालयबाट करिब १५ किलोमिटर टाढा दुर्गाभगवती गाउँपालिका–मत्सरीस्थित स्वास्थ्य शाखा प्रमुख प्रविण झाको निजी निवासमा पुगेका थिए । सोही स्थानमा लेखा शाखाका कर्मचारी सत्यनारायण सहनीमार्फत विभिन्न विकास योजनासम्बन्धी भुक्तानीका चेक तयार पार्ने तथा वितरण गर्ने कार्य भइरहेको सूचनाका आधारमा प्रहरी त्यहाँ पुगेको थियो ।
गरुडा नगरपालिकाका नगर प्रमुख कन्थमणि प्रसाद जयसवालले आर्थिक कारोबार कानुनी प्रक्रिया पूरा गरी कार्यालयबाटै सञ्चालन गर्न पटक–पटक निर्देशन दिइएको भए पनि त्यसको अवज्ञा गरिएको आरोप लगाए । उनका अनुसार केही कर्मचारी र जनप्रतिनिधिको समन्वयमा कार्यालयबाहिरबाटै भुक्तानी प्रक्रिया अघि बढाइएको थियो ।
नगर प्रमुख जयसवालले अधिकांश विकास योजनाको कार्यान्वयन तथा भुक्तानी प्रक्रिया प्रमुख प्रशासकीय अधिकृतको नियन्त्रणमा केन्द्रित भएको दाबी गर्दै कतिपय योजना पूर्ण रूपमा सम्पन्न नभइसकेको अवस्थामा समेत सम्पूर्ण रकम निकासा गर्ने तयारी भइरहेको सूचना प्राप्त भएपछि प्रशासनलाई जानकारी गराइएको बताए । उनले नगरपालिकाको नियमित प्रशासनिक कामकाज प्रभावित हुने गरी कार्यालय बन्द गरिएको तथा आफूले कार्यालयमै उपस्थित भएर काम सञ्चालन गर्न आग्रह गर्दा पनि प्रमुख प्रशासकीय अधिकृतले त्यसलाई अस्वीकार गरेको उल्लेख गरे ।
घटनापछि रौतहटका प्रमुख जिल्ला अधिकारी दिनेशसागर भुसालले प्रारम्भिक अध्ययनबाट वित्तीय अनुशासन तथा प्रशासनिक प्रक्रियाको उल्लङ्घन भएको देखिएको भन्दै प्रमुख प्रशासकीय अधिकृत न्यौपानेमाथि आवश्यक विभागीय कारबाहीका लागि सङ्घीय मामिला तथा सामान्य प्रशासन मन्त्रालयमा सिफारिस गरिएको जानकारी दिए ।
सरकारी कार्यालयको औपचारिक प्रक्रिया छाडेर निजी निवासबाट सार्वजनिक रकमको भुक्तानी प्रक्रिया सञ्चालन गरिएको विषयलाई गम्भीर रूपमा लिइएको जनाउँदै सम्बन्धित निकायले घटनाको विस्तृत अनुसन्धान अघि बढाएको जनाएको छ ।
-Recovered@1x_1-1792306880.jpg){kind=logo}
-Recovered@1x_1-1792308710.jpg){kind=logo}
