ठाकुर राम बहुमुखी क्याम्पसमा सम्पन्न स्वतन्त्र विद्यार्थी युनियन (स्ववियू) निर्वाचनको रोकिएको मतगणना सुचारु गर्न पर्साका सम्पूर्ण राजनीतिक दलहरू एकमत भएका छन् ।
जिल्ला प्रशासन कार्यालय, पर्सामा बसेको सर्वदलीय बैठकले मतगणनालाई तत्काल सुरु गर्न सहमति जनाएका हुन् ।
बैठकमा फर्जी शैक्षिक प्रमाणपत्रका आधारमा विद्यार्थी भर्ना गर्ने गिरोहमाथि छानबिन गरी दोषीउपर कडा कारबाही गर्नुपर्नेमा सबैदल सहमत भएका छन् । बैठकमा सहभागी दलहरूले मतपेटिकाको सुरक्षा सुनिश्चित गर्न प्रशासनलाई आग्रह गर्दै निष्पक्ष र पारदर्शी मतगणना गर्न जोड दिएका छन् ।
बैठकमा पर्साका प्रमुख जिल्ला अधिकारी (प्रजिअ) गणेश अर्यालले फर्जी प्रमाणपत्रको आधारमा विद्यार्थी भर्ना गर्नेलाई कुनै पनि हालतमा उन्मुक्ति नदिने स्पष्ट पारे । उनले दोषीमाथि निर्मम रूपमा कारबाही हुने प्रतिबद्धता व्यक्त गर्दै फर्जी प्रमाणपत्र प्रकरणको जडसम्म पुगेर सत्यतथ्य सार्वजनिक गर्ने बताए ।
बैठकमा पर्साका प्रहरी प्रमुख एसपी गौतम मिश्र र सशस्त्र प्रहरी १३ न गणका गणपति राधेश्याम धिमालले मतपेटिका सुरक्षामा कुनै त्रुटि नरहेको दाबी गरे । एसपी मिश्रले ठाकुरराम क्याम्पसको सम्पूर्ण सिसिटिभी फुटेज सुरक्षित रहेको जानकारी दिँदै मतपेटिकामा हस्तक्षेप वा धाँधली हुन नसक्ने विश्वास दिलाएका थिए ।
बैठकमा प्रमुख राजनीतिक दलका प्रतिनिधिहरूको उपस्थिति थियो । नेकपा एमाले पर्साका अध्यक्ष डा। विश्वम्भर शर्माले सबै दलका भातृ संगठनहरूलाई मतगणनाको सत्यतथ्यबारे स्पष्ट पार्ने प्रतिबद्धता जनाएका थिए ।
राष्ट्रिय स्वतन्त्र पार्टीका सभापति हरि पन्तले मतपेटिकामा खसेको मतको ससम्मान गन्ती हुनुपर्नेमा कसैको फरक मत नरहेको बताए । उनले मतगणनाको प्रक्रिया पारदर्शी रूपमा अगाडि बढाउन सबै दल सहमत भएको जानकारी दिए ।
नेपाली कांग्रेस पर्साका प्रवक्ता रमेश पाण्डे, नेता नवीन सिंह, राष्ट्रिय स्वतन्त्र पार्टी पर्साका सभापति हरि पन्त, जसपाका सिगासन साह तेली, तबरेज अहमद, माओवादी केन्द्रका प्रभाकर गुप्ता, समाजवादी पार्टीका मनोज चौधरीलगायत नेताहरूले निष्पक्ष मतगणनाको पक्षमा एकमत हुँदै मतपेटिकामा खसेको मतको सम्मान जनक गन्ती हुनुपर्नेमा जोड दिए ।
