काठमाडौं । बंगालको खाडीमा विकसित न्यून चापीय क्षेत्र चक्रवातीय आँधीमा परिणत हुने सम्भावना रहेकाले आगामी कात्तिक ११ देखि १५ गतेसम्म (अक्टोबर २८ देखि नोभेम्बर १ सम्म) नेपालको मौसम प्रभावित हुन सक्ने देखिएको छ ।
नेपाल मौसम विज्ञान विभागअन्तर्गत मौसम पूर्वानुमान महाशाखाका अनुसार शुक्रबार (अक्टोबर २३) बिहान ५ः४५ बजे पूर्वमध्य तथा दक्षिणपूर्वी बंगालको खाडी आसपास न्यून चापीय क्षेत्र विकसित भएको हो ।
उक्त मौसम प्रणाली क्रमशः बलियो हुँदै कात्तिक ९ गते (अक्टोबर २६) चक्रवातीय आँधीमा विकसित हुने सम्भावना रहेको महाशाखाले जनाएको छ। उक्त प्रणाली पश्चिम–उत्तरपश्चिम दिशातर्फ अघि बढ्दै भारतको उत्तर आन्ध्र प्रदेश तथा दक्षिण ओडिशाको तटीय क्षेत्र आसपासबाट जमिनमा प्रवेश गर्ने अनुमान गरिएको छ ।
यस मौसम प्रणालीको प्रभावका कारण कात्तिक ११ देखि १५ गतेसम्म नेपालको मौसम प्रभावित हुन सक्ने विभागले जनाएको छ । यद्यपि, यसबाट नेपालमा हुने वर्षाको मात्रा, जोखिमको स्तर तथा सम्भावित असरबारे अहिले नै यकिन गर्न नसकिने महाशाखाले स्पष्ट पारेको छ ।
सम्भावित प्रतिकूल मौसमका कारण कृषि तथा पर्यटन क्षेत्रमा असर पर्न सक्ने भएकाले सम्बन्धित सबैलाई सतर्क रहन विभागले अनुरोध गरेको छ ।
मौसम पूर्वानुमान महाशाखाले उक्त प्रणालीको निरन्तर अनुगमन गरिरहेको जनाएको छ । मौसम प्रणालीको विकासक्रम र नेपालमा पर्न सक्ने प्रभावबारे आवश्यकताअनुसार थप सूचना सार्वजनिक गरिने विभागले जनाएको छ ।
विभागले मौसमसम्बन्धी आधिकारिक तथा अद्यावधिक जानकारीका लागि आफूले जारी गर्ने सूचनाहरू नियमित रूपमा अवलोकन गर्नसमेत आग्रह गरेको छ ।
