जगरनाथपुर गाउँपालिकाको आयोजनामा कार्यस्थलमा आधारित सीप तथा क्षमता विकास तथा जीवन उपयोगी तालिम शुरू भएको छ ।
वडा नम्बर ५ मसिहानीस्थित पशु सेवा कार्यालयको सभाहलमा आयोजित उक्त तालिमले स्थानीयलाई सीपमूलक ज्ञान प्रदान गर्दै रोजगारमुखी बनाउने लक्ष्य लिएको छ ।
तालिमको उद्घाटन गर्दै गाउँपालिका अध्यक्ष श्रीकान्त यादवले प्रधानमन्त्री रोजगार कार्यक्रम अन्तर्गतका परम्परागत श्रममुखी योजनालाई परिमार्जन गर्दै, व्यावहारिक सीप प्रदान गर्ने कार्यक्रम सञ्चालन गरिएको बताए । उनले यस किसिमका तालिमहरूले स्थानीयलाई आत्मनिर्भर बनाउने तथा रोजगारी सिर्जना गर्ने विश्वास व्यक्त गरे ।
४० दिने तालिम कार्यक्रम अन्तर्गत महिला तथा पुरुषका लागि अलग – अलग समूहमा तालिम सञ्चालन गरिएको छ । अध्यक्ष यादवले तालिममा सक्रियताका साथ सहभागी भई सिकेको सीपलाई व्यवहारमा उतार्न आग्रह गरे ।
गाउँपालिकाले आगामी दिनमा पनि यस्ता कार्यक्रमलाई निरन्तरता दिने बताउँदै, स्थानीयस्तरमै रोजगारीको अवसर सिर्जना गर्ने उद्देश्यले अन्य सीप विकास कार्यक्रम सञ्चालन गर्ने थप योजना बनाएको प्रमुख प्रशासकिय अधिकृत सन्देश यादवले बताए ।
कार्यक्रममा महिलाले खाना पकाउने, घरकाे काममा मात्रै सिमित नभएर सिप सिकेर राेजगार बन्न जगरनाथपुर गाउँपालिकाकी उपाध्यक्ष बबिता सिंहले आग्रह गरिन् ।
क्रियटिभ स्किल्स प्रा. लि.को सहकार्यमा आयोजित तालिममा ४० जना महिला तथा पुरुषको सहभागिता रहेको छ । तालिमका प्रशिक्षकहरू संदिप साह र अर्जुन पटेलले सहभागीलाइ आवश्यक ज्ञान तथा व्यावहारिक प्रशिक्षण प्रदान गर्ने आयोजकले जनाएकाे छ ।
