सुनसरीको हरिनगर गाउँपालिका–५ स्थित वसन्तपुरमा भीषण आगलागी हुँदा ९ परिवारका २६ घरटहरा जलेर नष्ट भएका छन् ।
सोमबार दिउँसो ३ बजे सबिर मियाको भान्साकोठाबाट सुरु भएको आगो तीव्र रुपमा फैलिँदै जाँदा ठूलो क्षति पुगेको हो । जिल्ला प्रहरी कार्यालय सुनसरीका प्रहरी नायब उपरीक्षक (डीएसपी) योगराज खतिवडाका अनुसार आगलागी थप फैलिन नदिन ३ वटा घरटहरा भत्काउनु परेको थियो ।
आगो नियन्त्रणका लागि सुनसरीको इनरुवा, हरिनगर, दुहबी र इटहरीबाट दमकल खटाइएको थियो । करिब साढे १ घण्टाको प्रयासपछि आगलागी नियन्त्रणमा आएको प्रहरीको भनाइ छ ।
आगलागीमा कुनै मानवीय क्षति नभए पनि स्थानीयका घरमा भएका लत्ताकपडा, नगद, गरगहना, खाद्यान्न लगायतका सामग्री पूर्णरूपमा जलेर नष्ट भएका छन् । आगलागीबाट प्रभावित परिवार बिचल्लीमा परेका छन् । स्थानीय सरकार तथा विभिन्न सहयोगी संस्थाहरूले राहत वितरण प्रक्रिया सुरु गरिसकेको छ ।
हरिनगर गाउँपालिका अध्यक्ष हाजी गफार अन्सारीले तत्कालका लागि प्रभावित परिवारलाई खाद्यान्न, त्रिपाल, न्यानो लुगा लगायतका राहत सामग्री उपलब्ध गराइएको बताएका छन् । स्थानीय तह, रेडक्रस तथा अन्य संघसंस्थाहरूले थप राहत वितरणको प्रक्रिया अगाडि बढाइरहेका छन् ।
आगलागीको विस्तृत क्षतिको विवरण संकलन भइरहेको प्रहरीले जनाएकाे छ ।
