पकहाँमैनपुर गाउँपालिका वडा नं. २ सुर्याहाका रामरत्न दासकी नातिनी तथा रमेश दासकी सात वर्षीय छोरी रोशनी दासको सर्पदंशका कारण मृत्यु भएको छ ।
प्राप्त जानकारीअनुसार, रोशनी शनिबार दिउँसो कट्टिमठ अगाडि रहेको पोखरीको डिलमा बाख्रा चराउने क्रममा सर्पले टोकेको थियो । सर्पले टोकेको थाहा पाएपछि परिवारले उनलाई तत्कालै पोखरिया स्थित जिल्ला अस्पतालमा पुर्याएका थिए । तर, उपचार सम्भव नभएपछि थप उपचारका लागि नारायणी अस्पताल, वीरगंज लैजाने क्रममा बाटोमै उनको मृत्यु भएको चिकित्सकहरूले जनाएका छन् ।
स्थानीयवासीहरूका अनुसार समय मै प्रभावकारी उपचार सेवा उपलब्ध नभएका कारण रोशनीको ज्यान गएको हो । सर्पदंशजस्ता आकस्मिक अवस्थामा तात्कालिक उपचार नपाउँदा ज्यान जोखिममा पर्ने घटना बढ्दै गएकाले अब प्रत्येक पालिका स्तरमा सर्पदंश उपचार सेवा अनिवार्य रूपमा सञ्चालन गर्नुपर्ने आवश्यकता रहेको स्थानीयहरू बताउँछन् ।
यस दुखद घटनाले स्थानीय तहको स्वास्थ्य सेवाको पहुँच र गुणस्तरप्रति गम्भीर प्रश्न उठाएको छ । घटनापछि मैनपुर गाउँपालिकाका बासिन्दाहरूले हाम्रै गाउँ ठाउँकाे पालिकामा सर्पदंश उपचारकाे व्यवस्थापन मिलाउनुपर्ने माग गरेका छन् ।
चिकित्सकहरूका अनुसार सर्पदंशको उपचार समयमै भएमा धेरैजसो ज्यान बचाउन सकिन्छ । त्यसका लागि स्वास्थ्य संस्थाहरूमा प्रशिक्षित जनशक्ति, पर्याप्त औषधि तथा तत्काल सेवा उपलब्ध हुन जरुरी छ ।
