सप्तरी र धनुषा जिल्लामा भएको दुई छुट्टाछुट्टै सवारी दुर्घटनामा दुई जना पैदलयात्रीको मृत्यु भएको छ ।
सप्तरीको शम्भुनाथ नगरपालिका–३, कचनदाहास्थित सडकमा शुक्रबार राति ट्याक्टरको ठक्करबाट ५५ वर्षीय मागैनय खंग खत्वेको मृत्यु भएको हो ।
प्रदेश २–०१–००१ त ०९०९ नम्बरको ट्याक्टर कठौनाबाट कचनदाहातर्फ जाँदै गर्दा खत्वेलाई ठक्कर दिएको थियो । दुर्घटनामा गम्भीर घाइते भएका खत्वेलाई तत्काल छिन्नमस्ता अस्पताल, राजविराज लगिएको थियो तर उपचारको क्रममा उनको मृत्यु भएको जिल्ला प्रहरी कार्यालय सप्तरीले जनाएको छ ।
प्रहरीले घटनापछि ट्याक्टर चालकलाई नियन्त्रणमा लिएको छ ।
त्यसैगरी, धनुषाको मिथिला नगरपालिका–६ स्थित सडकमा ढल्केवरबाट महेन्द्रनगरतर्फ जाँदै गरेको हाल नम्बर नखुलेको सवारी साधनको ठक्करबाट सिराहा धनगढीमाई नगरपालिका–६ बस्ने ५५ वर्षीय बिन्देश्वर महराको मृत्यु भएको छ । दुर्घटनामा गम्भीर घाइते भएका महरालाई उपचारका लागि मोडल अस्पताल, लालगढ पुर्याइएको थियो। तर, उपचारकै क्रममा उनको मृत्यु भएको जिल्ला प्रहरी कार्यालय धनुषाले जानकारी दिएको छ ।
प्रहरीका अनुसार ठक्कर दिने सवारी साधन फरार रहेको छ र खोजी कार्य जारी छ ।
