सर्लाहीको लालबन्दी नगरपालिका–५ मेजरगञ्जस्थित भित्री सडकखण्डमा बुधबार राति भएको सवारी दुर्घटनामा एक युवकको मृत्यु भएपछि स्थानीय बासिन्दा आक्रोशित बनेका छन् । आक्रोशित स्थानीयहरूले दुर्घटनामा संलग्न टिपरमा आगजनी गरेका छन् ।
बुधबार राति करिब ८ बजेतिर जब्दीबाट लालबन्दीतर्फ आउँदै गरेको ना २ क ५०१ नम्बरको टिपरले साइकल यात्रीलाई ठक्कर दिएको थियो । ठक्करबाट कबिलासी नगरपालिका–८ अगर्वाका २० वर्षीय सचिन साह गुप्ता गम्भीर घाइते भएका थिए । उनलाई उपचारका लागि तत्काल प्रादेशिक अस्पताल मलंगवा पुर्याइएको थियो। तर, राति ९ बजे चिकित्सकहरूले मृत घोषणा गरेका थिए ।
घटनापछि टिपर चालक फरार भएको र सवारीसाधन घटनास्थलमै रहेको थाहा पाएपछि स्थानीय आक्रोशित बने । उनीहरूले टिपर हटाउन अवरोध गर्दै प्रदर्शन गरे। प्रहरीले अवस्था नियन्त्रणमा लिन प्रयास गरे पनि बेलुका पौने ९ बजेतिर भीडले टिपरमा आगजनी गरेका थिए ।
सर्लाही प्रहरीले दिएको जानकारी अनुसार आगलागीबाट टिपरको अगाडिको भाग पूर्ण रूपमा जलेर नष्ट भएको छ । स्थिति नियन्त्रणमा लिन इलाका प्रहरी कार्यालय लालबन्दीका इन्स्पेक्टर वीरेन्द्र सिंह जोहारीको कमान्डमा १३ जना सुरक्षाकर्मी परिचालित गरिएका थिए। साथै नजिकका प्रहरी कार्यालयहरूबाट थप फोर्स समेत झिकाइएको थियो ।
दमकलको सहयोगमा आगो नियन्त्रणमा लिइएको प्रहरीले जनाएको छ । दुर्घटनामा संलग्न टिपरलाई राति सवा २ बजे क्रेनमार्फत तानेर जिल्ला ट्राफिक कार्यालय नवलपुरमा राखिएको छ ।
