पर्सा जिल्लाको जगरनाथपुर गाउँपालिकाले २२औं राष्ट्रिय धान दिवसका अवसरमा वडा नं. ४ स्थित सुहपुर सोहरिमा विशेष कार्यक्रमको आयोजना गरी भव्य रूपमा मनाएको छ।
गाउँपालिका अध्यक्ष श्रीकान्त यादवको अध्यक्षतामा सम्पन्न कार्यक्रममा प्रमुख प्रशासकीय अधिकृत सन्देश कुमार यादव, उपाध्यक्ष बबिता सिंह क्षेत्री, वडा नं. ४ का अध्यक्ष नेपाली प्रसाद कुशवाहा, कृषि अधिकृत दयानन्द चौहान, वडा सदस्यहरू, पालिका कर्मचारी, स्थानीय किसान तथा सर्वसाधारणको उल्लेखनीय सहभागिता रहेको थियो ।
कार्यक्रमलाई सम्बोधन गर्दै अध्यक्ष यादवले धान नेपालीको पहिचान मात्र नभई संस्कृति र समृद्धिसँग पनि जोडिएको उल्लेख गर्नुभयो । उहाँले कृषिमा आत्मनिर्भर बन्न सबै किसान दाजुभाइ तथा दिदीबहिनीहरूलाई थप मेहनत गर्न आग्रह गर्दै गाउँपालिकाले आधुनिक प्रविधि, तालिम तथा सहुलियतपूर्ण अनुदानमार्फत निरन्तर सहयोग गर्दै आएको र आगामी दिनमा अझ सशक्त रूपमा सहयोग गर्ने प्रतिबद्धता जनाउनुभयो ।
कार्यक्रममा किसानहरूको सम्मान, धान उत्पादन प्रवर्द्धन र आधुनिक कृषि प्रविधिको प्रयोग सम्बन्धी विषयमा छलफल गरिएको थियो । साथै, प्रतीकात्मक रूपमा धान रोपाइँ कार्यक्रम समेत आयोजना गरिएको थियो, जसले कार्यक्रममा थप आकर्षण प्रदान गरेको थियो ।
