काठमाडौँ | राष्ट्रिय मुक्ति पार्टीले कैलाली कारागारभित्र कैदीबन्दीका दुई समूहबीच भएको हिंसात्मक झडप सरकार र कारागार प्रशासनको गम्भीर लापरबाहीको परिणाम भएको आरोप लगाएको छ ।
उक्त झडपमा परेर भरत चौधरीको मृत्यु हुनुका साथै ४८ जना कैदीबन्दी घाइते भएका थिए ।
पार्टीका प्रवक्ता रवीन्द्र कुमार श्रेष्ठले सोमबार विज्ञप्ति जारी गर्दै भनेका छन्, “कारागार प्रशासनको गम्भीर सुरक्षा लापरवाही र राज्यको उदासीनताले एउटा जीवन समय अगावै समाप्त भयो । राज्यको सुरक्षा नियन्त्रण भित्र यसरी मृत्यु हुनु सामान्य घटना होइन। सुरक्षा संयन्त्रको नियन्त्रणमा पनि नागरिक सुरक्षित नहुने अवस्था गृह प्रशासनको चरम लापरबाहीको रूपमा लिएका छौँ ।”
उनले यस घटनालाई ‘अचानक भएको झडप’ भनेर लुकाउने प्रयासलाई अस्वीकार गर्ने बताएका छन् ।
विज्ञप्तिमा भनिएको छ, “५९० भन्दा बढी कैदीबन्दीको हस्ताक्षरसहित कारागारभित्रको सुरक्षा अभाव र तनावबारे राज्य पक्षलाई अग्रिम जानकारी दिइएको थियो, तर आवश्यक सतर्कता, व्यवस्थापन र सुरक्षाको कदम चालिएन। यसको सम्पूर्ण जिम्मेवारी गृह प्रशासनले लिनुपर्छ । यो घटना केवल दुर्भाग्य होइन, बरु गम्भीर लापरवाही र संवेदनहीनताको परिणाम हो ।”
