बारा | मोतिहारी–अमलेखगञ्ज पेट्रोलियम पाइपलाइनमा देखिएको प्राविधिक समस्या अझै मर्मत भएको छैन । पाइपलाइनको समस्या समाधानका लागि भारतीय आयल कर्पोरेसन (आईओसी) को प्राविधिक टोलीले साउन ३१ गते (अगस्ट १६) मर्मत कार्य सुरु गर्ने भनिए पनि अहिलेसम्म कार्य सुरु भएको छैन, नेपाल आयल निगमले जनाएको छ ।
नेपाल आयल निगम, मधेस प्रादेशिक कार्यालय, अमलेखगञ्जका प्रमुख प्रलयंकर आचार्यले रातोपाटीसँगको कुराकानीमा मर्मत कार्य यही २३ गतेबाट सुरु हुने जानकारी दिए । उनले भने, “आईओसीबाट उच्चस्तरीय कर्मचारीसहित १५–१६ जनाको प्राविधिक टोली फिल्डमा प्रारम्भिक काम सुरु गरिसकेको छ । तर पाइपलाइनको मुख्य प्रणालीमा गर्नुपर्ने संवेदनशील मर्मत कार्य २३ तारिखदेखि हुनेछ, जुन सम्पन्न हुन करिब ५–६ दिन लाग्ने अनुमान छ ।”
उनले मर्मत अवधिमा इन्धन आपूर्तिमा असर नपर्ने दावी गर्दै बताए कि नयाँ पाइपलाइन प्रणालीबाट आपूर्ति केही समयका लागि रोकिए पनि वैकल्पिक व्यवस्था मिलाइएको छ । “हामी पुरानो प्रणालीलाई पूर्ण क्षमतामा सञ्चालन गर्नेछौँ। यसकारण कुनै डिपोमा तेलको अभाव हुँदैन,” उनले भने ।
आचार्यका अनुसार मर्मत कार्य सुरु हुन १६ तारिखमा योजना भए पनि आईओसीको प्राविधिक, जनशक्ति र सामग्री व्यवस्थापनमा ढिलाइ भएका कारण कार्य २३ तारिखमा सारिएको हो । साथै, पाइपलाइन हाल परीक्षण चरणमा रहेकोले मर्मतको सम्पूर्ण जिम्मेवारी र लागत आईओसीले नै व्यहोर्नेछ ।
भिडियाे सामाग्री
