वीरगंज । नेपाली कांग्रेसका महामन्त्री गगनकुमार थापाले वीरगञ्ज आसपासमा देखिएको हैजा सङ्क्रमण नियन्त्रणका लागि अत्यावश्यक औषधि र जनशक्ति तम्तयार अवस्थामा राख्नुपर्ने आवश्यकता औंल्याउनुभएको छ ।
महामन्त्री थापाले आज नारायणी अस्पतालमा हैजाका बिरामी र उनीहरूका आफन्तसँग भेटघाट गरी अस्पताल प्रशासनसँग छलफल गर्दै हैजा उपचारमा कुनै कमजोरी नगर्न आग्रह गर्नुभयो । उहाँले भन्नुभयो,
“हैजाको उपचार गर्न आउने बिरामीले निःशुल्क रूपमा गुणस्तरीय स्वास्थ्य सेवा पाउनुपर्छ । त्यसका लागि अत्यावश्यक औषधि, खोप र जनशक्तिको उचित प्रबन्ध गर्न जरुरी छ । ”
उहाँले काठमाडौं फर्किएपछि स्वास्थ्य तथा जनसङ्ख्या मन्त्रालय र अन्य सरोकार निकायसँग समन्वय गरेर औषधि तथा आवश्यक सहयोगका लागि पहल गर्ने प्रतिबद्धता व्यक्त गर्नुभयो । साथै अस्पतालको सरसफाइप्रति विशेष ध्यान दिन आग्रह गर्दै उहाँले भन्नुभयो,
“म स्वास्थ्यमन्त्री हुँदा पनि देशभरका अस्पतालमा सरसफाइ मुख्य समस्या थियो । नौ महिनाको कार्यकालमा समाधानको प्रयास गरे पनि सकिएन । सरसफाइ शौचालय वा परिसर मात्र सफा गर्ने विषय होइन, यो अस्पतालको सुशासनसहित बहुआयामिक विषयसँग सम्बन्धित छ ।”
थापाले निजी र सरकारी अस्पतालबीचको सरसफाइ फरकको अनुभवलाई उल्लेख गर्दै नारायणी अस्पताललाई वीरगञ्ज र आसपासको क्षेत्रका लागि भरोसाको केन्द्रका रूपमा विकास गर्न सबै सरोकारवालाले जोड दिनुपर्नेमा बल दिनुभयो ।
उहाँले नारायणी अस्पतालको पूर्वाधार निर्माणमा देखिएका अवरोध फुकाउन आफू जुनसुकै सहयोग र समन्वय गर्न तयार रहेको समेत स्पष्ट पार्नुभयो ।
भिडियाे सामाग्री
