रौतहट । संघीय मामिला तथा सामान्य प्रशासनमन्त्री भगवती न्यौपानेले स्थानीय तहमा खटाइएका प्रमुख प्रशासकीय अधिकृत (प्रशाअ) हरूले अनिवार्य रूपमा हाजिर गर्नुपर्ने बताउनुभएको छ ।
मन्त्री न्यौपानेले खटाइएको दरबन्दीअनुसारका प्रमुख प्रशासकीय अधिकृतलाई हाजिर नगराउने स्थानीय तहको हकमा यसअघि दिइएको निमित्त प्रमुख प्रशासकीय अधिकृतको आर्थिक जिम्मेवारी रद्द गरिने जानकारी दिनुभयो ।
हाजिर हुन नजाने कर्मचारीलाई पहिलो चरणमा स्थानीय तहमा जान प्रेरित गरिने र जान नमाने कार्यरत स्थानमै हाजिर गर्न रोक लगाइने उहाँले स्पष्ट पार्नुभयो । यस कार्यान्वयनका लागि सबै सरोकारवालाको सहयोग अपरिहार्य रहेको मन्त्री न्यौपानेको भनाइ छ ।
मन्त्रालयले बिहीबार राति गरेको १२२ जना उपसचिव तथा ९७ जना शाखा अधिकृतको सरुवामध्ये रौतहटमा १५ जना उपसचिव र एक जना शाखा अधिकृत खटाइएको छ । १८ वटा स्थानीय तहमध्ये चन्द्रपुर नगरपालिका र दुर्गाभगवती गाउँपालिका बाहेक १६ वटै स्थानीय तहमा यसअघि निमित्त प्रमुख प्रशासकीय अधिकृतले जिम्मेवारी सम्हालिरहेका थिए ।
खटाइएका प्रमुख प्रशासकीय अधिकृत हाजिर भएलगत्तै रौतहटका ती स्थानीय तहहरू निमित्त प्रमुख प्रशासकीय अधिकृतबाट मुक्त हुनेछन् । संघीय मामिला तथा सामान्य प्रशासन मन्त्रालयले माधवनारायण, मौलापुर, फतुवा विजयपुर, इशनाथ, परोहा, राजपुर, कटहरिया, देवाहीगोनाही, वृन्दावन, गरुडा, राजदेवी, गौर, बौधीमाइ, गढिमाइ र गुजरा नगरपालिकामा उपसचिवलाई र यमुनामाई गाउँपालिकामा शाखा अधिकृतलाई प्रमुख प्रशासकीय अधिकृतका रूपमा खटाएको हो ।
रौतहटका केही नगरपालिकामा मन्त्रालयले विगत आठ वर्षयता उपसचिव तहको प्रमुख प्रशासकीय अधिकृत खटाएको थिएन । मन्त्रालयले अब सबै स्थानीय तहमा दरबन्दीअनुसार प्रशासकीय अधिकृतको व्यवस्था गरेको विषय सराहनीय रहेको नेपाल पत्रकार महासंघ रौतहटका पूर्व अध्यक्ष प्रेमचन्द्र झाको भनाइ छ ।
नेपाल नगरपालिका संघका अध्यक्ष भिमप्रसाद ढुङ्गानाले बाध्यतावश निमित्त प्रमुख प्रशासकीय अधिकृतमार्फत जिम्मेवारी सम्हाल्दा समस्या आउने गरेको भन्दै दरबन्दीअनुसार प्रशासकीय अधिकृत पठाइएको निर्णय स्वागतयोग्य रहेको प्रतिक्रिया दिनुभयो ।
त्यसैगरी गाउँपालिका राष्ट्रिय महासंघ नेपालकी अध्यक्ष लक्ष्मीदेवी पाण्डेले प्रमुख प्रशासकीय अधिकृत र स्थानीय तहबीच ‘नङ र मासु’ जस्तो सम्बन्ध हुने भएकाले द्वन्द्व फैलाउने प्रवृत्तिका कर्मचारीलाई पठाउन नहुने बताउनुभयो । मन्त्रालयले निमित्त हटाएर दरबन्दीअनुसार प्रमुख प्रशासकीय अधिकृत खटाएको कदम सकारात्मक रहेको र यसलाई निरन्तरता दिनुपर्ने उहाँको भनाइ छ ।
भिडियाे सामाग्री
