जनकपुरधाम | धनुषाको गणेशमान चारनाथ नगरपालिका–६, गोदार चोकस्थित एक मोबाइल पसलमा चोरी गर्ने गिरोहलाई प्रहरीले नियन्त्रणमा लिई सार्वजनिक गरेको छ ।
मोबाइल पसलमा चोरी गरेको आरोपमा गणेशमान चारनाथ नगरपालिका–७ का २० वर्षीय अर्जुन मुखिया, सोही ठाउँका २० वर्षीय सञ्जिव पासवान र गणेशमान चारनाथ नगरपालिका–५ का २२ वर्षीय कृष्ण मण्डललाई पक्राउ गरिएको प्रहरीले जनाएको छ ।
इलाका प्रहरी कार्यालय ढल्केवरका प्रहरी निरीक्षक जटाशङ्कर यादaवका अनुसार भदौ ६ गते विहान करिब १ः४५ बजे धनुषाधाम नगरपालिका–८, केसरकुट्टी निवासी राजकुमार साहले गोदारमा सञ्चालन गर्दैआएको ‘राजकुमार मोबाइल पसल’को सटर फोडी चोरी भएको थियो ।
पसलबाट विभिन्न कम्पनीका ४५ थान मोबाइल सेट, दुई थान ड्रोन क्यामेरा, टेम्पर ग्लास, भित्ते घडी, हाते घडी र नगद ९८ हजार ७६५ रुपियाँसहित करिब १० लाख रुपियाँ बराबरको धनमाल चोरी भएको प्रहरीले जनाएको छ ।
घटनापछि अनुसन्धान अघि बढाउँदा पसलमा जडान गरिएको सिसिटिभि फुटेजको आधारमा चोरीमा संलग्न तीन जनालाई नियन्त्रणमा लिइएको हो । पक्राउ परेकाहरूको साथ र लुकाएको स्थानबाट विभिन्न कम्पनीका १२ थान मोबाइल सेट र घडीलगायतका सामान बरामद गरिएको निरीक्षक यादवले जानकारी दिनुभयो ।
पक्राउ परेकामाथि चोरी तथा डकैतीसम्बन्धी कसूरमा मुद्दा दर्ता गरी थप अनुसन्धान अघि बढाइएको प्रहरीले जनाएको छ ।
भिडियाे सामाग्री
