महोत्तरी । जलेश्वरस्थित ट्राफिक प्रहरी चौकीमा बिहीबार दिउँसो आगजनी भएको छ । अज्ञात समूहले पेट्रोल छर्केर आगजनी गरेको प्रहरीले जनाएको छ ।
जलेश्वरस्थित बस स्ट्यान्ड नजिकै रहेको ट्राफिक कार्यालयमा आगजनीको घटना भएको हो । जिल्ला प्रहरी कार्यालय महोत्तरीका प्रहरी उपरिक्षक हेरम्ब शर्माका अनुसार केही संख्यामा आएका अज्ञात व्यक्तिहरूले बिहीबार दिउँसो १:३० बजे कार्यालयमा आगजनी गरेका हुन् ।
आगलागीबाट एक थान कम्प्युटर र कार्यालयका कुर्सी–टेवल डढेर खरानी भएका छन् । घटनास्थलमा तत्काल पुगेको नेपाल प्रहरी, सशस्त्र प्रहरी र नेपाली सेनाको टोलिले आगो नियन्त्रणमा लिएपछि थप क्षति हुनबाट जोगिएको प्रहरीले जनाएको छ ।
प्रहरी उपरिक्षक शर्माले आगजनी गर्ने समूहको खोजी कार्य तीव्र पारिएको र सीसीटीभी फुटेज लगायतका अन्य स्रोतबाट अनुसन्धान भइरहेको बताए ।
