बारा । कलैया–मलाही १६ किलोमिटर सडक खण्डको अत्यन्तै जीर्ण अवस्थाका कारण नेपाल स्वतन्त्र अटो चालक मजदुर युनियन सङ्घले बिहीबारदेखि अनिश्चितकालीन सडक बन्द गर्दै आन्दोलन सुरु गरेको छ । बिहान ८ बजेदेखि पूर्णरुपमा सडक आवागमन रोकिएको सङ्घले जनाएको छ ।
कलैया–गञ्ज भवानीपुरबीच पसाहा खोलाको पुल नजिक करिब डेढ सय टेम्पु चालकले आफ्ना सवारीसाधन सडकमै रोकेपछि यातायात पूर्ण रूपमा अवरुद्ध भएको सङ्घका अध्यक्ष सफिक अन्सारीले जानकारी दिनुभयो । सडकभरि रहेका खाल्डा–खुल्डी, जोखिमपूर्ण यात्रा र महिनौँसम्म मर्मत नहुँदा चालकहरू आक्रोशित बनेका हुन् ।
सडक मर्मतका माग
आन्दोलनरत चालकहरूले सडक एकनासको बनाउने, तत्काल कालोपत्र गर्ने लगायतका माग राखेका छन् । महिनामा झन्डै १० हजार रुपैयाँ मात्र आम्दानी हुने चालकहरूले बिग्रिएको सडकका कारण १५ हजार रुपैयाँसम्म मर्मत–सम्भारमै खर्चिनुपर्ने बाध्यता रहेको पूर्व अध्यक्ष वीरेन्द्र साह कानुले बताउनुभयो ।
यसअघि प्रमुख जिल्ला अधिकारीमार्फत सडक मर्मतको मागसहित ज्ञापनपत्र बुझाए पनि प्रभावकारी कदम नचालिएको भन्दै चालकहरू असन्तुष्ट बनेका हुन् । ‘‘प्रशासनले बेवास्ता गरेपछि बाध्य भएर सडक बन्द गर्नु परेको’’ आन्दोलनरत एक चालकले बताए ।
स्थानीय बासिन्दा र यात्रु समस्या बढ्दै
वैकल्पिक मार्ग नहुँदा स्थानीय बासिन्दा, विद्यार्थी तथा दैनिक यात्रु अत्यन्त प्रभावित भएका छन्। विद्यालय जाने विद्यार्थी, अस्पताल जानुपर्ने बिरामी तथा दैनिक कामकाजमा निर्भर नागरिकहरू गन्तव्यमा पुग्न नसक्दा समस्या बढेको छ ।
स्थानीय प्रहरी, इलाका प्रहरी तथा ट्राफिक प्रहरी आन्दोलनकर्तासँग छलफलको तयारीमा भए पनि ‘ठोस मर्मतको आश्वासन नआएसम्म आन्दोलन जारी’ रहने अडान टेम्पु चालकहरूले राखेका छन् । भीड व्यवस्थापन र सम्भावित विवाद रोक्न प्रहरीले सुरक्षा व्यवस्था कडा पारेको प्रहरी नायब वरिष्ठ निरीक्षक विनोद राना मगरले बताए ।
वर्षौँदेखि जीर्ण सडक, जनप्रतिनिधिमाथि असन्तोष
आन्दोलनकारीहरूका अनुसार कलैया–मलाही सडक वर्षौँदेखि जीर्ण रहे पनि स्थानीय तहदेखि जनप्रतिनिधिसम्मको ध्यान नपुगेको छ । ‘‘यस क्षेत्रबाट दुई–दुई पटक उपराष्ट्रपति र एक पटक केन्द्रीय अध्यक्ष जितेर गए, तर एक पटक पनि सडक हेर्न आएनन्,’’ उनीहरूले आरोप लगाए ।
सडक पूर्वाधार कार्यालयसँग समन्वय गरी समाधान खोज्ने प्रयास भइरहेको भए पनि कहिले मर्मत सुरु हुन्छ भन्ने विषय अनिश्चित छ ।
