काठमाडौं । अख्तियार दुरुपयोग अनुसन्धान आयोगले धनुषाको कमला नगरपालिकाका तत्कालीन नगर प्रमुख राम उदगार गोइतसहित १० जनाविरुद्ध रु २९ लाख ४४ हजार १३७ को भ्रष्टाचार मुद्दा दायर गरेको छ ।
आयोगका प्रवक्ता राजेन्द्रकुमार पौडेलका अनुसार मुद्दा दायर गरिएका अन्य व्यक्तिहरूमा तत्कालीन निमित्त प्रमुख प्रशासकीय अधिकृत वीरेन्द्र कुमार सढान, लेखापाल (पाँचौं) सञ्जिव कुमार महतो, जिन्सी शाखा प्रमुख जुगल किशोर यादव, तत्कालीन कार्यपालिका सदस्य धनेश्वर यादव, धर्मनाथ मण्डल, पल्टु कवारी, विनोद राम, समसुल मिया मोमिन तथा एस एण्ड एस बिल्डर्स प्रालिका अध्यक्ष सन्तोष कुमार यादव छन् ।
आयोगका अनुसार उनीहरूले कमला नगरपालिका–३, लग्मा बजारस्थित पोखरीको डिलमा माटो पुर्ने तथा घाट निर्माण गर्ने कार्यका लागि ‘सबैभन्दा न्यून कबोल’ गरेका ठेकेदारलाई छाडेर दोस्रो प्रस्ताव दातासँग मिलेमतो गरी सम्झौता गरेको आरोप छ।
आर्थिक वर्ष २०७६/७७ का लागि पोखरीको डिलमा माटो पुर्ने, घाट निर्माण तथा सौन्दर्यकरण गर्न मूल्य अभिवृद्धि करसहित ७५ लाख रुपैयाँ लागत अनुमान स्वीकृत गरिएको थियो ।
उक्त निर्माणका लागि २०७६ चैत १८ मा राष्ट्रिय स्तरको बोलपत्र आह्वान गरिएको थियो । मूल्याङ्कन समितिको बैठक (२०७७ वैशाख २३) ले सबैभन्दा कम कबोल गर्ने राजविराज–४, सप्तरीस्थित सेट स्क्वायर कन्सट्रक्सन प्रालि को बोलपत्र रु ४२ लाख ७४ हजार ५५१ लाई सारभूत रूपमा प्रभावग्राही ठहर गर्दै सिफारिस गरेको आयोगले जनाएको छ ।
तर, त्यसलाई बेवास्ता गर्दै ईन्फ्रास्ट्रक्चर एस एण्ड बी बिल्डर्स प्रालि ले प्रस्ताव गरेको रु ७२ लाख २१ हजार ७३० को महँगो कबोललाई रोज्दै सम्झौता मिलेमतोमा गरिएको ठहर गर्दै अख्तियारले मुद्दा दायर गरेको हो ।
