नेपाल विद्युत् प्राधिकरणले ओखरपौवा–तीनपिप्ले खण्डमा २२० केभी क्षमताको उच्चस्तरीय प्रसारण लाइन निर्माण गर्ने भएको छ । यसका लागि प्राधिकरणले प्रारम्भिक वातावरणीय परीक्षण (IEE) प्रतिवेदनको तयारी गरेको छ ।
प्राधिकरणको स्वामित्वमा रहेको त्रिशूली–थ्री बी हब–मातातीर्थ प्रसारण लाइन आयोजनाको टावर नम्बर ३७ बाट ट्यापिङ गरी नयाँ प्रसारण लाइन निर्माण गर्न लागिएको हो । सो लाइन काठमाडौँको तीनपिप्लेमा जडान हुनेछ, जहाँ हाल प्राधिकरणले नयाँ सबस्टेसन निर्माण गरिरहेको छ ।
यो प्रसारण लाइन धादिङको धुनीबेँसी नगरपालिका, नुवाकोटको ककनी गाउँपालिका हुँदै काठमाडौँको तारकेश्वर नगरपालिका–स्थित तीनपिप्ले सम्म विस्तार गरिनेछ ।
प्राधिकरणका अनुसार प्रसारण लाइन तथा सबस्टेसन निर्माण र सञ्चालनका क्रममा आयोजना प्रभावित क्षेत्रको भौतिक, रासायनिक, सामाजिक–आर्थिक तथा सांस्कृतिक वातावरणमा पर्न सक्ने सम्भावित प्रभावहरूको अध्ययन भइरहेको छ । प्रारम्भिक वातावरणीय परीक्षण प्रतिवेदनको मस्यौदामा सरोकारवालाहरूका सुझाव समावेश गरी थप परिमार्जन गरिने जनाइएको छ ।
यसै क्रममा प्राधिकरणले धुनीबेँसी नगरपालिका–१, सिम्खडा गाउँमा सार्वजनिक सुनुवाइ गर्ने कार्यक्रम तय गरेको छ । यसअघि सोमबार तारकेश्वर नगरपालिका–स्थित कोट गाउँमा सार्वजनिक सुनुवाइ सम्पन्न भइसकेको प्राधिकरणले जनाएको छ । सार्वजनिक सुनुवाइका क्रममा उठेका विषयवस्तुहरू IEE प्रतिवेदनमा समावेश गरिने प्राधिकरणले स्पष्ट पारेको छ ।
