मुख्यमन्त्री कृष्ण प्रसाद यादवले मधेश स्वास्थ्य विज्ञान प्रतिष्ठानलाई व्यवस्थित र गुणस्तरीय बनाउने विषयमा प्रदेश सरकारले पूर्ण रुपमा तत्पर रहेको बताएका छन् । मंगलबार प्रतिष्ठानको पाँचौँ वार्षिकोत्सव समारोहको उद्घाटन गर्दै मुख्यमन्त्री यादवले प्रतिष्ठानको विकासका लागि प्रदेश सरकारसँगै दातृनिकायबाट पनि सहयोग जुटाउन आग्रह गरे । उनले मधेश प्रदेशमा करिब ६५ लाख जनसंख्या रहेको भए पनि पर्याप्त स्वास्थ्य सेवा अझै पहुँचमा नपुगेको उल्लेख गर्दै, प्रतिष्ठानलाई बलियो र आमजनको सहज पहुँचयुक्त बनाउन व्यवस्थापनतर्फ गम्भीर हुनुपर्ने बताए ।
मुख्यमन्त्री यादवले भने – “जनकपुरधाममै जस्तोसुकै बिरामीको उपचार सम्भव होस् भन्ने उद्देश्यले प्रदेश सरकार सजग छ । शिक्षक, होस्टेल, व्यवस्थित अस्पताल लगायत आवश्यक सहयोगका लागि बजेट छुट्याइएको छ । प्रतिष्ठानलाई काठमाण्डौको वीर अस्पतालको स्तरमा पु¥याउने लक्ष्य हामीसँग छ ।” स्वास्थ्य तथा जनसंख्या मन्त्री जंगीलाल रायले प्रतिष्ठानको विकासका लागि प्रदेश सरकारले सबै प्रकारको सहयोग गर्ने र तत्काल आवश्यक निर्माण कार्यमा गम्भीर हुन आग्रह गरे। डा. प्रमोद यादवले पनि प्रतिष्ठानको भौतिक पूर्वाधार निर्माणका लागि छिट्टै टेण्डर आह्वान गरी प्रक्रिया अघि बढाइने जानकारी दिए ।
उक्त समारोहमा उपकुलपति प्रा.डा. अंकुर साह, शिक्षाध्यक्ष रामनरेश पण्डित, रजिष्ट्रार प्रा.डा. विनोद कुमार यादव लगायतले प्रतिष्ठानको स्थापना देखि हालसम्मको अवस्थाबारे अनुभव तथा आवश्यकताबारे बोलेका थिए । समारोहमा मुख्यमन्त्री यादवले प्रतिष्ठानले प्रकाशित गरेको “कोशिश” मुखपत्रको लोकार्पण पनि गरे ।
प्रतिष्ठान वि.सं. २०७७ मा स्थापना भएको र पाँच वर्षमा उल्लेखनीय प्रगति गरेको छ । मधेश प्रदेशमै पहिलो सरकारी एमबीबीएस कार्यक्रम सञ्चालन गर्ने संस्था हो । स्नातक तहमा बी.एस्सी. नर्सिङ, बी.एन.एस, जनस्वास्थ्य, प्रयोगशाला चिकित्सालगायतका कार्यक्रमहरू नियमित सञ्चालन हुँदै आएका छन् । स्नातकोत्तर तहमा बालरोग, प्रसुति तथा स्त्रीरोग, इन्टरनल मेडिसिन, जनरल सर्जरीमा विशेषज्ञस्तरको शिक्षा प्रदान भइरहेको छ । हाल १४ वटा थप स्नातकोत्तर सिट प्राप्त भई शैक्षिक क्षमता विस्तार भइरहेको छ ।
स्वास्थ्य अनुसन्धानमा प्रगति गर्दै प्रतिष्ठानले नेपाल स्वास्थ्य अनुसन्धान परिषद्बाट संस्थागत समीक्षा समितिको स्वीकृति प्राप्त गरेको छ । क्याथ ल्याब, एमआरआई, न्यूरो सर्जरी सेवा, हाडजोर्नी विभाग (४० शैय्या), विशिष्ट बर्न वार्ड सञ्चालनमा छन् । अस्पतालमा ४० भन्दा बढी विशिष्टीकृत विभागमार्फत सेवा उपलब्ध छन् । आकस्मिक सेवा, आइसीयू, एनआइसीयू, पीआइसीयू, डायलासिस सेवा (२१ शैय्या), आधुनिक दन्त सेवा पनि सञ्चालनमा छ । कुल ३८५ शैय्या अस्पतालमा सञ्चालन भइरहेको छ ।
प्रतिष्ठानले स्वास्थ्य बीमा, निःशुल्क औषधि वितरण, टेलिमेडिसिन सेवा, सुरक्षित गर्भपतन सेवा, सामाजिक सेवा कार्यक्रममार्फत आम जनतालाई सहुलियत प्रदान गर्दै आएको छ । प्रतिष्ठानले चिकित्सा शिक्षा र स्वास्थ्य सेवा प्रवाहलाई आधुनिक, प्रभावकारी र सर्वसुलभ बनाउने दिशामा महत्वपूर्ण कदमहरू चालेको छ ।
