रौतहट मा निर्वाचनका लागि खटिएका म्यादि प्रहरी पोशाकको पैसाको विषयलाई लिएर आन्दोलनमा उत्रिएका छन् । सरकारले पोशाकको छुट्टै पैसा माग गरेको आरोप लगाउँदै म्यादि प्रहरीहरूले इलाका प्रहरी कार्यालय गरुडा घेराउ गरी प्रदर्शन गरेका हुन् ।
सयौंको संख्यामा सहभागी म्यादि प्रहरीहरूले केहीबेर गौर–चन्द्रनिगाहपुर सडकखण्ड अवरुद्ध गरेका थिए । सडक जामका कारण सवारी साधन लामो समयसम्म रोकिएका थिए भने यात्रुहरू प्रभावित भएका थिए । म्यादि प्रहरीहरू पोशाक बुझ्न प्रहरी कार्यालय पुगेका थिए । तर बिना चेक पोशाक दिन नसकिने बताएपछि उनीहरू आक्रोशित बनेका हुन् ।
सरकारले पारिश्रमिकबापत ४४ हजार रुपैयाँ दिने र पोशाकको पैसा नलिने जानकारी गराएको भए पनि अहिले पोशाकबापत ब्लैंक सादा चेक मागिएको म्यादि प्रहरीहरूको भनाइ छ । पोशाकका लागि ६ हजार १७० रुपैयाँ बराबरको चेक मागिएको उनीहरूले बताएका छन् ।
पोशाकको मूल्य ६ हजारभन्दा बढी तोकिए पनि सो बराबरको गुणस्तरको पोशाक नभएको कतिपय म्यादि प्रहरीको गुनासो छ । बिना चेक पोशाक उपलब्ध गराउनुपर्ने उनीहरूको माग छ । कुनै हालतमा पोशाकबापत पैसा वा चेक नदिने अडान उनीहरूले लिएका छन् ।
सरकारले निर्वाचनपछि पोशाकबापत ६ हजार १७० रुपैयाँ फिर्ता दिने भए त्यसको लिखित प्रमाण उपलब्ध गराउनुपर्ने उनीहरूको माग छ । लिखित सहमति भएमा मात्र चेक दिन तयार रहेको म्यादि प्रहरीहरूले बताएका छन् । पोशाक रकमबारे टुंगो नलागेसम्म आन्दोलन जारी रहने चेतावनी उनीहरूले दिएका छन् ।
यसैबीच, इलाका प्रहरी कार्यालय गरुडाले म्यादि प्रहरीले पाउने पारिश्रमिकबाट पोशाकको रकम नकटिने जनाएको छ । पारिश्रमिकबाहेक पोशाकको छुट्टै रकम दिने व्यवस्था रहेको कार्यालयका इन्स्पेक्टर रामकुमार शर्मा ले जानकारी दिनुभयो । हालका लागि ड्रेसबापत चेक लिनुपर्ने र निर्वाचनपछि सो रकम फिर्ता गरिने उहाँको भनाइ छ ।
.jpg-2-1769587845.jpg)
