रौतहट सदरमुकाम गौरमा भएको झडपको घटना नियन्त्रणमा लिन स्थानीय प्रशासनले प्रयास तीव्र पारेको छ । अहिले गौर लगायतका क्षेत्रमा ठूलो संख्यामा सुरक्षाकर्मी परिचालन गरिएको छ भने थप सेना पनि खटाइएको छ ।
प्रमुख जिल्ला अधिकारी दिनेशसागर भुसालले झडप रोक्ने प्रयास भइरहेको बताएका छन् । “बजार क्षेत्रमा झडपको घटना क्रमशः रोकिँदै गएको छ,” उनले भने, “तर भित्री क्षेत्रमा केही व्यक्तिहरूले ढुंगामुडा गरिरहेका छन् । सुरक्षाकर्मी अवस्था नियन्त्रणमा लिन खटिएका छन् ।”
शुक्रबारदेखि सुरु भएको झडप नियन्त्रणका लागि स्थानीय प्रशासनले दिउँसो १ बजेदेखि कर्फ्यु आदेश जारी गरेको छ । बिहानैदेखि सेना परिचालन गरिएपछि गौरको मुख्य सडक शान्त देखिए पनि भित्री भागमा अवस्था अझै तनावग्रस्त रहेको जनाइएको छ ।
गौर नगरपालिका–४ मचकुटिया टोलमा केहीबेरअघि एउटा स्कुटरमा आगजनी गरिएको छ भने आधा दर्जन सवारी साधनमा क्षति पुगेको प्रहरीले जनाएको छ ।
गौर नगरपालिका–६ स्थित सनगढा गाउँमा शुक्रबार बिहेको बाजाको विषयलाई लिएर दुई पक्षबीच भएको झडप उग्र बन्दै गएपछि तनाव सुरु भएको हो । स्थिति नियन्त्रणमा लिन प्रहरीले हवाई फायर तथा अश्रुग्यास प्रहार गरेको थियो ।
जिल्ला प्रशासन कार्यालयले पूर्वतर्फ मुडबलवा गेट, पश्चिमतर्फ लालबकैया बाँध, उत्तरतर्फ बम नहर र दक्षिणतर्फ गौर भन्सार कार्यालयसम्म कर्फ्यु क्षेत्र तोकेको जनाएको छ । प्रशासनले सर्वसाधारणलाई शान्ति कायम राख्न र अनावश्यक भीडभाड नगर्न आग्रह गरेको छ ।
.jpg-2-1769587845.jpg)
