वीरगंज | चैते दशैंको पावन अवसरमा वीरगंज महानगरपालिकामा आज परम्परागत रूपमा मौलो पूजा सम्पन्न गरिएको छ । महानगरपालिकाका प्रमुख राजेशमान सिंह ले आज महानगर कार्यालय परिसरमा विधिपूर्वक मौलो पूजा तथा अर्चना गर्नुभएको हो ।
धार्मिक तथा सांस्कृतिक मान्यताअनुसार महानगर प्रहरी तथा बारुण यन्त्र (दमकल) परिसरमा स्थापना गरिएको मौलोमा नगर प्रमुख सिंहले पूजा अर्चना गर्दै नगरवासीको सुख, शान्ति, समृद्धि तथा विपद्बाट सुरक्षाको कामना गर्नुभयो । उहाँले आगलागी, प्राकृतिक प्रकोप तथा अन्य आकस्मिक घटनाबाट नगरलाई सुरक्षित राख्न खटिने सुरक्षाकर्मीहरूको भूमिकाको प्रशंसा गर्नुभयो ।
हरेक वर्ष चैते दशैंका अवसरमा आयोजना गरिने मौलो पूजाले धार्मिक आस्था संरक्षण गर्नुका साथै सुरक्षा निकायप्रति सम्मान प्रकट गर्ने परम्परालाई निरन्तरता दिँदै आएको छ । आज सम्पन्न कार्यक्रममा महानगरपालिकाका जनप्रतिनिधि, कर्मचारी, महानगर प्रहरी, बारुण यन्त्रका कर्मचारी तथा स्थानीयवासीहरूको सहभागिता रहेको थियो ।
पूजा पश्चात् नगर प्रमुख सिंहले धार्मिक तथा सांस्कृतिक परम्पराले समाजमा सकारात्मक ऊर्जा, एकता र सहकार्यको भावना विकास गर्न महत्वपूर्ण भूमिका खेल्ने उल्लेख गर्नुभयो । उहाँले यस्ता संस्कारहरूको संरक्षण र प्रवर्द्धन आवश्यक रहेकोमा जोड दिनुभयो ।
चैते दशैं नेपाली हिन्दू समुदायले शक्ति स्वरूपा देवीको आराधना गरी मनाउने महत्वपूर्ण पर्व हो । यस अवसरमा देशभरका शक्तिपीठ, मन्दिर तथा सार्वजनिक स्थलहरूमा विशेष पूजा, आराधना तथा धार्मिक कार्यक्रमहरू आयोजना गरिन्छ ।
-1772177803.jpg)
