जनकपुरधाम स्थित एक डान्स बारमा कार्यरत युवतीहरूले यौनकार्य गर्न अस्वीकार गर्दा सामूहिक कुटपिट गरिएको घटनामा दुई जना पक्राउ परेका छन् ।
धनुषा प्रहरीले घटनामा संलग्न आरोपमा बारका दुई कर्मचारीविरुद्ध मानव बेचबिखन तथा ओसारपोसारसम्बन्धी मुद्दा अघि बढाएको जनाएको छ । जनकपुरधाम उपमहानगरपालिका–१४ मुजेलियास्थित ‘ब्ल्याक एण्ड ह्वाइट डान्स बार क्लब’मा चैतको पहिलो साता घटना भएको हो ।
पीडित चार जना युवतीले आफूहरू यौनजन्य कार्यमा संलग्न हुन अस्वीकार गर्दा अमानवीय व्यवहार र कुटपिट गरिएको भन्दै प्रहरीमा उजुरी दिएका थिए । सोही आधारमा बारका लेखापाल सञ्जयकुमार यादव र कर्मचारी काशिन्द्र महतोलाई पक्राउ गरिएको जिल्ला प्रहरी प्रवक्ता डीएसपी गणेशबहादुर बमले जानकारी दिएका छन् ।
पीडितका अनुसार उनीहरू ‘वेट्रेस’को रूपमा काम गर्न भन्दै बारमा भर्ना भएका थिए । तर, व्यवस्थापन पक्षले ग्राहकसँग जबरजस्ती शारीरिक सम्बन्ध राख्न दबाब दिँदै आएको थियो ।
चैत ३ गते विवाद भएपछि युवतीहरूले यौनकार्य अस्वीकार गर्दा उनीहरूलाई एउटा कोठामा थुनेर लात्ती, मुक्का र पाइपले निर्घात कुटपिट गरिएको उजुरीमा उल्लेख छ। पीडितहरूले आफूहरूलाई बाहिर निस्कन नदिएको, मोबाइल खोसिएको र मानसिक दबाबमा राखिएको बताएका छन् । काम गरेबापतको ज्याला र टिप्ससमेत नदिइएको उनीहरूको गुनासो छ ।
पीडितहरूले आइतबार औपचारिक रूपमा मानव बेचबिखन तथा ओसारपोसारसम्बन्धी जाहेरी दिएपछि Dhanusha District Court ले पक्राउ परेकामाथि अनुसन्धानका लागि म्याद थप गरेको छ ।
प्रहरीका अनुसार पीडितहरूलाई सुरक्षित स्थानमा राखी उपचार तथा कानुनी परामर्श उपलब्ध गराइएको छ भने घटनामा संलग्न अन्य व्यक्तिहरूको खोजी जारी छ ।
नेपालको मानव बेचबिखन तथा ओसारपोसार ( नियन्त्रण ) ऐन, २०६४ अनुसार यस्तो अपराधमा संलग्नलाई १० देखि २० वर्षसम्म कैद र ५० हजारदेखि ५ लाख रुपैयाँसम्म जरिवानाको व्यवस्था छ ।
-1772177803.jpg)
