बालेन शाह नेतृत्वको नवगठित सरकारले तत्कालीन प्रधानमन्त्री केपी शर्मा ओलीलाई पक्राउ गरेपछि देशभर राजनीतिक तरङ्ग फैलिएको थियो । २३ भदौमा भएको जेनजी आन्दोलन दमनको कारण सरकारले ओलीलाई पक्राउ गरेको बताइएको थियो ।
ओली पक्राउ परेसँगै नेकपा एमाले पनि तरङ्गित भयो । पार्टीले पक्राउको दिनै च्यासलस्थित मुख्यालयमा सचिवालय बैठक डाक्यो र देशव्यापी विरोध प्रदर्शन गर्ने निर्णय गर्यो ।
सचिवालय बैठकको निर्णय सुन्न आम कार्यकर्ता पार्टी कार्यालयमा जम्मा भएका थिए । मिडियाकर्मी र कार्यकर्ताको भिडले च्यासल क्षेत्र गर्माएको थियो । त्यही भिडमा महिलाको संख्या कम थियो, तर अमिसा पराजुली त्यहीँ उपस्थित थिइन् ।
सूर्यविनायक नगरपालिका – ७, गुण्डुकीकी अमिसा त्यतिसम्म सार्वजनिक वृत्तको राडरमा परेकी थिइनन् । बिजनेस स्टडिजमा स्नातक गर्दै आएकी उनको दैनिकी सामान्य नागरिक जस्तै थियो । पार्टीप्रति आस्था र ओलीको गिरफ्तारी गैरन्यायिक भएको बुझाइको कारण उनी बैठक सुन्न पार्टी कार्यालय पुगिन् ।
च्यासलमा केहीबेर प्रदर्शनपछि पार्टीको निर्णयअनुसार माइतीघरमा प्रदर्शन जारी भयो । प्रदर्शन शान्तिपूर्ण थिएन; प्रहरीले लाठीचार्ज गर्यो, केही कार्यकर्ता घाइते भए, र अमिसा त्यही भिडको हिस्सा थिइन् ।
माइतीघर प्रदर्शनको क्रममा एक मिडियाकर्मीले अमिसासँग प्रतिक्रिया लिन खोजे । उनले लोकतान्त्रिक हक प्रयोग गर्दै आफ्नो तर्क राखिन्, जुन क्यामेराले कैद भयो । भिडियो सामाजिक सञ्जालमा तीव्र रूपमा फैलियो ।
अमिसाले भनिन्, “गृह मन्त्रालय आफ्नो छ भन्दैमा जे पनि गर्न सकिन्छ भन्ने होइन । म सरकारमाथि निन्दा वा आलोचना गर्दैछिनँ । तर कानुनमाथि नाइके बन्न खोज्नेलाई चेतावनी दिन चाहन्छु ।”
भिडियो भाइरल भएपछि उनी अनपेक्षित रूपमा ट्रोल र धम्कीको निशानामा परिन् । सामाजिक सञ्जालमा यौन हिंसासम्बन्धी धम्की, अपमानजनक टिप्पणी र अभद्र सन्देशहरू व्यापक रूपमा आएका थिए। नाम र अनुहारसहित बलात्कारका धम्की आउँदा उनी मानसिक रूपमा प्रभावित भइन् र केही समयका लागि इन्स्टाग्राम डिएक्टिभेट गर्न बाध्य भइन् ।
अमिसाले भनिन्, “भाइरल हुनु मेरो उद्देश्य थिएन। मैले आफ्नो तर्क राखेको थिएँ, असहमति जनाउनेले जनाउन सक्छन्, सहमत हुनेले भइहाल्छ । तर यौन हिंसासम्बन्धी धम्की स्वीकार्य छैन ।”
धम्कीका कारण उनी सार्वजनिक रूपमा स्वतन्त्र रूपमा हिँडडुल गर्न असहज छिन् । परिवारको साथमा मात्र बाहिर जान सक्छिन् र अपरिचित नम्बरबाट आएको कल पनि उठाउन सक्दिनन् ।
अमिसाको भनाइ अनुसार, सामाजिक सञ्जालमा नाममा नक्कली टिकटक अकाउन्ट बनिसकेको छ र त्यहाँ लाइभ भई गिफ्ट लिन समेत भइरहेको छ । उनले सबै अकाउन्ट प्राइभेट गरेर राखेकी छिन् ।
अमिसाले प्रश्न उठाएकी छन्, “मेरो ठाउँमा पुरुष भएको भए के यस्तै प्रतिक्रिया आउँथ्यो? पुरुषबाट आएको भए तर्कमा बहस हुने थिए । तर महिला भएकै कारण यौनिकीकरण गरियो ।”
उनको परिवारले पनि उनको सुरक्षितता सुनिश्चित गर्नुपरेको छ । आमा भनिन्, “मेरी छोरीले केही गलत गरेकी छैनन् । लाज त कमेन्ट गर्ने मान्छेलाई हुनुपर्छ, मेरी छोरीलाई होइन ।”
अमिसाले केपी ओलीलाई दुई–अढाइ वर्षदेखि समर्थन गर्दै आएकी छिन् । कालापानी–लिपुलेक जस्ता राष्ट्रियता सम्बन्धी विषयले उनलाई नेताका रूपमा ओलीप्रति आकर्षित गरेको थियो। १६ वर्षकी हुँदा उनले ओलीलाई पहिलो पटक भेटेकी थिइन् ।
भाइरल भिडियोपछि सामाजिक सञ्जालमा आएका धम्की, ट्रोल र अपमानजनक कमेन्टले उनी मानसिक रूपमा प्रभावित भइन् । उनी साइबर ब्युरो मार्फत सबै स्क्रिनसट, आईडी र कमेन्ट संकलन गरिरहेकी छिन् ।
अमिसाले भनिन्, “अब हरेक महिला त्यस्ता कमेन्ट गर्नेको फोटो र स्क्रिनसट लिएर माइतीघरमा उभिनुपर्छ । जसले हाम्रो अपमान गर्नुपर्छ, उनीहरूको पनि त्यस्तै हुनुपर्छ । म यसका लागि अझ सशक्त भएर आउँछु ।”
-1772177803.jpg)
