पर्साकाे पोखरिया नगरपालिकास्थित मालपोत कार्यालयमा अनधिकृत रूपमा प्रवेश गरी सेवाग्राही र कर्मचारीलाई हैरानी दिएको आरोपमा प्रहरीले तीनजना बिचौलियालाई पक्राउ गरेको छ ।
इलाका प्रहरी कार्यालय, पोखरियाबाट खटिएको टोलीले अनावश्यकरूपमा प्रवेश गरी कामकाजमा बाधा पु¥याइरहेका तीनजनालाई नियन्त्रणमा लिएको हो । प्रहरी निरीक्षक प्रदीप पौडेलका अनुसार सेवाग्राही र कर्मचारीबाट पटक–पटक गुनासो आएपछि तत्काल कारबाही गरिएको हो ।
प्रहरीका अनुसार पक्राउ परेकाहरूलाई इलाका प्रहरी कार्यालयमा राखी आवश्यक अनुसन्धान अघि बढाइएको छ । प्रारम्भिक सोधपुछका क्रममा उनीहरूले आफूहरू लेखापढी व्यवसायीसँग सम्बन्धित रहेको दाबी गरेपनी उनीहरूले सेवाग्राहीबाट अनावश्यक शुल्क असुल्ने प्रयास गरेको आशङ्का गरिएको प्रहरी स्रोतले जनाएको छ ।
बिचौलियाको यस्तो गतिविधिले सेवाग्राहीलाई सास्ती हुनुका साथै कार्यालयको नियमित कामकाज समेत प्रभावित हुँदै आएको थियो । कतिपय सेवाग्राहीले छिटो काम गरिदिने भन्दै अतिरिक्त रकम माग्ने, कागजात अल्झाउने तथा अनावश्यक दबाब दिने गरिएको गुनासो गरेका छन् ।
यसैबीच, सोही मालपोत कार्यालयमा राजस्व सङ्कलनमा समेत अनियमितता भइरहेको विषय सार्वजनिक भएको छ । स्रोतका अनुसार सेवाग्राहीबाट उठाइने राजस्व पूर्ण रूपमा सरकारी खातामा दाखिला नगरी खाने गरेकाे छ । स्राेतका अनुसार उठेको राजस्व रकम र अभिलेखमा देखिएको रकमबीच अन्तर देखिनु नै अनियमितताको आधार भएको दाबी गरिएको छ ।
तर यता मालपोत कार्यालय पोखरियाका प्रमुख रामजी साहले भने तोकिएको दररेटअनुसार नै राजस्व सङ्कलन भइरहेको दाबी गरेका छन् । उनले कार्यालयबाट सेवा प्रवाह पारदर्शी रहेको र राजस्व दाखिलामा कुनै अनियमितता नभएको दाबी गरेका छन् ।
यसअघि कार्यालयले राजस्वबापत उल्लेख्य रकम सङ्कलन भएको विवरण सार्वजनिक गर्दै आफ्नो कार्यप्रणाली पारदर्शी रहेको जनाएको थियो । तर पछिल्लो आरोपपछि कार्यालयको विश्वसनीयता र पारदर्शितामाथि प्रश्न उठ्न थालेको छ ।
स्थानीय बासिन्दा तथा सेवाग्राहीहरूले राजस्व सङ्कलन र दाखिला प्रक्रियामा देखिएको अन्तरबारे अख्तियार दुरुपयोग अनुसन्धान आयोग वा सम्बन्धित निकायबाट छानबिन गरी यथार्थ सार्वजनिक गर्नुपर्ने माग गरेका छन् ।
सेवा विस्तारको उद्देश्यसहित स्थापना गरिएको पोखरिया मालपोत कार्यालयबाट ग्रामीण क्षेत्रका नागरिकलाई सहज सेवा दिने लक्ष्य राखिएको थियो । तर पछिल्ला घटनाक्रमले सेवा प्रवाहको विश्वसनीयता माथि प्रश्न उठाएको छ ।
