रौतहटको गरुडा नगरपालिका–५ महम्मदपुरस्थित लामो समयदेखि बन्द रहेको श्रीराम सुगर मिल्स पुनः सञ्चालन हुने आशामा स्थानीय सरोकारवालाहरूले चासो बढाएका छन् ।
जेनजी आन्दोलनपछि बदलिएको राजनीतिक परिदृश्य र नयाँ सरकारको सम्भावित नीति परिवर्तनसँगै उद्योग पुनर्जीवनको अपेक्षा बढेको हो । यद्यपि हालसम्म प्रस्तावित नीतिगत कार्यसूचीमा श्रीराम सुगर मिल्स समावेश नभए पनि स्थानीय तहमा पुनः सञ्चालनको सम्भावनाबारे चर्चा तीव्र बनेको छ ।
२०४९ सालमा उद्योगपति दिवाकर गोल्छाद्वारा स्थापना गरिएको श्रीराम सुगर मिल्स रौतहट, बारा र सर्लाहीका किसानका लागि प्रमुख उखु बजारका रूपमा परिचित थियो । अत्याधुनिक प्रविधिसहित सञ्चालनमा आएको उक्त उद्योगले दैनिक ठूलो परिमाणमा उखु प्रशोधन गर्ने क्षमता राख्थ्यो ।
उद्योग सञ्चालनमा रहँदा एक हजारभन्दा बढीले प्रत्यक्ष रोजगारी पाएका थिए भने हजारौं व्यक्ति ढुवानी, व्यापार, कृषि र सेवा क्षेत्रमा अप्रत्यक्ष रूपमा लाभान्वित भएका थिए । तर व्यवस्थापन कमजोरी र आर्थिक समस्याका कारण उद्योग २०७७ साउन ११ गते स्थायी रूपमा बन्द गरिएको थियो ।
त्यसयता किसानले उखु बिक्रीका लागि वैकल्पिक बजार खोज्नुपर्ने बाध्यता भोगिरहेका छन् भने कतिपयले उखु खेती नै घटाएका छन् ।
गरुडा नगरपालिकाका मेयर कन्थमणि प्रसाद जयसवालले उद्योग पुनः सञ्चालनका लागि सरकारले पहल गर्नुपर्ने आवश्यकता रहेको बताए । उनका अनुसार “सरकारले चाह्यो भने यो उद्योग पुनः सञ्चालन सम्भव छ” भन्दै नयाँ सरकारले उद्योग सञ्चालनतर्फ ठोस कदम चाल्नुपर्ने धारणा राखे ।
उखु उत्पादक संघ रौतहटका अध्यक्ष अशोक यादवका अनुसार उद्योग पुनः सञ्चालन भएमा किसानले उचित मूल्य पाउने मात्र होइन, मुलुकमै चिनी उत्पादन बढेर आयात निर्भरता घट्नेछ। उनका अनुसार यसले राष्ट्रिय अर्थतन्त्रमा सकारात्मक प्रभाव पार्नेछ ।
त्यस्तै नेता राम भरोस यादवले श्रीराम सुगर मिल्स एक समय देशकै गौरवका रूपमा रहेको उल्लेख गर्दै यसको पुनः सञ्चालनले मधेशको औद्योगिक विकासमा नयाँ ऊर्जा दिने बताए ।
स्थानीय सरोकारवालाहरूका अनुसार उद्योग पुनः सञ्चालन हुनु केवल उद्योग पुनः खुल्नु मात्र नभई समग्र क्षेत्रको आर्थिक पुनरुत्थानसँग जोडिएको विषय हो । उद्योग बन्द भएपछि बेरोजगारी बढेको र व्यापारिक गतिविधि समेत सुस्ताएको उनीहरूको भनाइ छ ।
उद्योगपति दिवाकर गोल्छाले उखु किसानलाई आत्मनिर्भर बनाउने उद्देश्यसहित स्थापना गरेको उक्त उद्योग २०७७ सालदेखि बन्द अवस्थामा रहेको छ । यद्यपि विगतका सरकारहरूले सञ्चालनका लागि प्रतिबद्धता जनाए पनि कार्यान्वयन हुन सकेको छैन ।
हाल नयाँ राजनीतिक परिस्थितिसँगै उद्योग पुनः सञ्चालन हुने आशा स्थानीयमा पुनः जागेको छ । तर उद्योग कहिले सञ्चालन हुन्छ भन्नेबारे स्पष्ट निर्णय भने आउन बाँकी छ ।
स्थानीयवासी, किसान तथा सरोकारवालाहरू अहिले सरकारको ठोस पहलको प्रतीक्षामा छन् । उद्योग पुनः सञ्चालन भएमा रोजगारी सिर्जना, कृषि उत्पादन वृद्धि र क्षेत्रीय औद्योगिक विकासमा ठूलो योगदान पुग्ने अपेक्षा गरिएको छ ।
