सीमावर्ती क्षेत्रमा बालबालिका तथा महिलामाथि हुने हिंसा तथा मानव बेचबिखनका घटना बढ्दै गएको सरोकारवालाहरूले बताएका छन् ।
विशेषगरी १२ देखि १४ वर्ष उमेर समूहका बालबालिका भारतीय पुरुषसँग प्रेम सम्बन्धमा परेर जोखिमपूर्ण रूपमा भारत आउने–जाने क्रम बढ्दै गएको उनीहरूको भनाइ छ । सोमबार वीरगंजमा स्ट्याण्डर्ड चार्टर्ड बैंकको सहयोगमा आफन्त नेपाल, पर्सा शाखाद्वारा आयोजित पालिकास्तरीय समन्वय तथा सहकार्य बैठकमा शाखा प्रमुख मनु रानाले संस्थाको कार्यप्रगति प्रस्तुत गर्दै विद्यमान चुनौतीबारे जानकारी दिइन् ।
बैठकमा सार्वजनिक गरिएको तथ्यअनुसार विभिन्न दुर्गम जिल्लाबाट ल्याइएका किशोरी तथा महिलालाई स्पा केन्द्रहरूमा परिचालन गरिने गरिएको छ भने भारतीय बालिकाहरूलाई वीरगंजका होटल तथा लजहरूमा जबरजस्ती यौन धन्दामा लगाउने गरिएको पाइएको छ। साथै, नेपाली बालिकाहरू भारतको रक्सौल क्षेत्रमा गई यौन व्यवसायमा संलग्न हुने संख्या बढ्दै गएको तथा भारतीय बालिका तथा किशोरीहरू पनि वीरगंजमा आएर यौन व्यवसायमा संलग्न हुने गरेको सरोकारवालाहरूले बताएका छन् ।
मनु रानाका अनुसार, आफन्त नेपाल पर्सा शाखाले सन् २०२५ मा वीरगन्जस्थित सीमा नाकाबाट २ सय ४५ चेलीबेटीको उद्धार तथा बचाउ गरेको थियो । सन् २०२६ को हालसम्म ७३ जनाको उद्धार गरिसकिएको उनले जानकारी दिइन् ।
यस्ता समस्याको न्यूनीकरणका लागि संस्थाले सुरक्षित आवास, मनोसामाजिक परामर्श, कानुनी सहायता, स्वास्थ्य उपचार, शिक्षा प्रेषण, सीप विकास तालिम तथा सशक्तिकरण कार्यक्रम सञ्चालन गर्दै आएको जनाएको छ ।
कार्यक्रममा सहभागी सरोकारवालाहरूले समुदाय स्तरमै विभिन्न प्रकारका हिंसाका घटना बढ्दै जानु गम्भीर चुनौती बनेको बताएका थिए ।
वीरगंज महानगरपालिकाका उपमेयर इम्तियाज आलमले यस्ता समस्याको समाधानका लागि सबै निकायबीच प्रभावकारी समन्वय आवश्यक रहेको बताए ।
कार्यक्रममा अध्यक्षता गरिरहेका आफन्त नेपालका प्रोजेक्ट म्यानेजर केशर विश्वकर्माले बदलिँदो समयसँगै महिला बेचबिखनका प्रवृत्ति पनि परिवर्तन हुँदै गएकाले यसलाई नियन्त्रण गर्न सरोकारवाला निकायहरू थप गम्भीर हुनुपर्नेमा जोड दिए ।
