पर्सा क्षेत्र नम्बर २ का प्रतिनिधिसभा सदस्य सुशील कुमार कानुले वीरगंज महानगरपालिका वडा नं. २६ अठराहा र वडा नं. २७ कुहडीमा पुगेर स्थानीय समस्याहरूको स्थलगत अवलोकन गरेका छन् ।
वडा नं. २६ अठराहामा स्थानीयहरूले विशेषगरी वर्षायाममा करिब ५०० बिघाभन्दा बढी खेतीयोग्य जमिन डुबानमा पर्ने समस्या रहेको गुनासो गरेका थिए । साथै, यस क्षेत्रमा नियमित रूपमा विद्युत् आपूर्ति नहुने समस्या पनि उठाइएको थियो ।
त्यसैगरी वडा नं. २७ कुहडीस्थित बहई बाल निकेतन आधारभूत विद्यालयको भवनमा प्लास्टर नहुँदा अध्ययन–अध्यापनमा कठिनाइ भइरहेको स्थानीयहरूले बताएका छन् । छठीघाट व्यवस्थापन, स्वास्थ्य चौकीमा औषधिको अभाव तथा बस्तीहरूमा विद्युत् पोल विस्तार नहुँदा दैनिक जनजीवन प्रभावित भएको गुनासो समेत उनीहरूले गरेका थिए ।
स्थानीयहरूसँगको छलफल तथा साक्षात्कारका क्रममा रास्वपा नेता सुधिर पटेल, क्षेत्र नम्बर २ का क्षेत्रीय अध्यक्ष फैयाज मिया, वडा नं. २७ का वडा अध्यक्ष हृदय नारायण कुर्मी लगायतको उपस्थिति रहेको थियो ।
स्थानीय समस्याहरू सुनेपछि सांसद कानुले सम्बन्धित निकायलाई तत्काल जानकारी गराई समाधानका लागि पहल गर्ने प्रतिबद्धता व्यक्त गरेका थिए । उनले केही समस्या स्थानीय तहबाटै समाधान गर्न सकिने भन्दै आवश्यक समन्वय गरी अघि बढाइने बताए ।
