वीरगंज महानगरपालिका वडा नं. ८ मा नवनिर्मित वडा कार्यालय भवनको आज एक विशेष समारोहका बीच उद्घाटन गरिएको छ ।
भवनको उद्घाटन महानगरपालिकाका प्रमुख राजेशमान सिंह ले गर्नुभएको हो ।
महानगरपालिकाले आर्थिक वर्ष २०७९/८० मा सार्वजनिक रूपमा टेण्डर आह्वान गरी निर्माण प्रक्रिया अघि बढाएको उक्त भवन एसडी कन्स्ट्रक्सन ले निर्माण गरेको हो । करिब ७९ लाख रुपैयाँको लागतमा सम्पन्न भएको भवन दुई तले पक्की संरचनामा तयार गरिएको छ, जसमा सेवा प्रवाहका लागि आवश्यक आधुनिक सुविधाहरू समावेश गरिएको जनाइएको छ ।
यसअघि वडा कार्यालयको आफ्नै भवन नहुँदा नजिकैको विद्यालयको कोठाबाट सेवा सञ्चालन हुँदै आएको थियो। यसले सेवाग्राहीलाई साँघुरो ठाउँ, असुविधा र सेवा ढिलाइ जस्ता समस्या भोग्न बाध्य बनाएको थियो । नयाँ भवन सञ्चालनमा आएपछि सेवा प्रवाह व्यवस्थित, छिटो र नागरिकमैत्री बन्ने विश्वास स्थानीयवासीहरूले व्यक्त गरेका छन् ।
उद्घाटन समारोहलाई सम्बोधन गर्दै प्रमुख राजेशमान सिंह ले स्थानीय तहबाट प्रदान गरिने सेवा प्रभावकारी बनाउन भौतिक पूर्वाधारको विकास अत्यन्त आवश्यक रहेको बताउनुभयो । “अब वडा स्तरबाटै नागरिकले सहज, छिटो र गुणस्तरीय सेवा पाउनेछन्,” उहाँले भन्नुभयो, “महानगरले आगामी दिनमा पनि यस्ता पूर्वाधार विकासलाई प्राथमिकतामा राखेर अघि बढ्नेछ ।”
त्यसैगरी, महानगरपालिकाका प्रमुख प्रशासकीय अधिकृत अरविन्द लाल कर्ण ले सेवा प्रवाह सुधारमा नयाँ भवनले महत्वपूर्ण भूमिका खेल्ने उल्लेख गर्नुभयो । उहाँले कर्मचारी व्यवस्थापन, सेवा प्रणाली र प्रविधिको प्रयोगलाई समेत थप प्रभावकारी बनाइने जानकारी दिनुभयो ।
कार्यक्रममा विभिन्न वडाका वडा अध्यक्षहरू, जनप्रतिनिधि, स्थानीय बुद्धिजीवी, समाजसेवी तथा सर्वसाधारणको उल्लेखनीय उपस्थिति रहेको थियो । सहभागीहरूले नयाँ भवन निर्माणले स्थानीय सरकारप्रति नागरिकको विश्वास अझ मजबुत हुने विश्वास व्यक्त गरेका छन् ।
स्थानीय तहको सुदृढीकरण, सेवा पहुँच विस्तार र सुशासन प्रवर्द्धनतर्फ यो भवनलाई महत्वपूर्ण उपलब्धिको रूपमा हेरिएको छ ।
