उपराष्ट्रपति रामसहायप्रसाद यादवले स्वास्थ्य अनुसन्धानलाई नीति निर्माण र कार्यक्रम कार्यान्वयनको मुख्य आधार बनाउनुपर्नेमा जोड दिएका छन् ।
Nepal Health Research Council द्वारा आयोजित ‘स्वास्थ्य तथा जनसङ्ख्या वैज्ञानिकहरूको राष्ट्रिय शिखर सम्मेलन’को उद्घाटन गर्दै उपराष्ट्रपति यादवले वैज्ञानिक तथ्य र तथ्याङ्कका आधारमा स्वास्थ्य नीति निर्माण गर्नु संवैधानिक दायित्व भएको बताए ।
उनले स्वास्थ्य अनुसन्धानलाई केवल शैक्षिक अभ्यासमा सीमित नराखी प्रत्यक्ष रूपमा नीति र कार्यक्रमसँग जोड्नुपर्ने उल्लेख गरे । नेपालको संविधानको धारा ३५ ले स्वास्थ्यलाई मौलिक हकका रूपमा सुनिश्चित गरेको स्मरण गराउँदै उनले अनुसन्धानले महामारी नियन्त्रण, रोग व्यवस्थापन र स्वास्थ्य प्रवर्द्धनमा महत्वपूर्ण भूमिका खेल्ने बताए ।
उपराष्ट्रपति यादवका अनुसार देशमा बढ्दो नसर्ने रोग, जलवायु परिवर्तनको प्रभाव र भौगोलिक विविधताका कारण स्वास्थ्य सेवामा देखिएको असमानता समाधान गर्न अनुसन्धान अपरिहार्य छ ।
उनले अनुसन्धानका नतिजालाई शैक्षिक प्रकाशनमा मात्र सीमित नराखी नीति निर्माणमा प्रयोग गर्नुपर्नेमा जोड दिए । साथै, परम्परागत उपचार पद्धति र आधुनिक वैज्ञानिक अनुसन्धानबीच समन्वय आवश्यक रहेको बताए ।
कार्यक्रम ‘प्रमाणमा आधारित निर्णय तथा कार्यान्वयनका लागि स्वास्थ्य अनुसन्धान शासन’ भन्ने नाराका साथ सुरु भएको तीन दिने सम्मेलन हो । सम्मेलनले अनुसन्धानकर्ता, नीति निर्माता र शिक्षाविद् बीच सहकार्य र संवादलाई थप सुदृढ बनाउने अपेक्षा गरिएको छ ।
उपराष्ट्रपतिले परिषद्ले स्वास्थ्य अनुसन्धानको विकास र नियमनमा खेलेको भूमिकाको प्रशंसा गर्दै सम्मेलन सफलताको शुभकामना पनि व्यक्त गरेका छन् ।
