महोत्तरीमा अन्तरजातीय विवाह गरेको निहुँमा जातीय छुवाछुत तथा अमानवीय व्यवहार गरेको आरोपमा एक महिला पक्राउ परेकी छन् । औरही नगरपालिका – ५ निवासी ४५ वर्षीया वविता देवीलाई सोही आरोपमा प्रहरीले नियन्त्रणमा लिएको हो ।
जिल्ला प्रहरी कार्यालय महोत्तरीका अनुसार माघ ८ गते दर्ता भएको मुद्दापछि फरार रहेकी उनलाई लुकिछिपी बसेको अवस्थामा घरबाटै पक्राउ गरिएको हो। उक्त मुद्दा उनकी बुहारी इन्द्रा कुमारी मण्डलको जाहेरीका आधारमा दर्ता गरिएको थियो ।
इन्द्रा कुमारी मण्डलका अनुसार आफूले नाबालक सन्तानसहित घर प्रवेश गर्न खोज्दा सासुले “कुलदेवता रिसाउने” भन्दै कुटपिट गर्नुका साथै घरभित्र प्रवेश गर्न नदिएको र जातीय रूपमा अपमानजनक व्यवहार गरेको आरोप लगाइएको छ ।
उनका श्रीमान् मेघनाथ यादव हाल सम्पर्कविहीन रहेको जनाइएको छ । इन्द्राले श्रीमानसहित परिवारका अन्य सदस्यविरुद्ध अंश मुद्दासमेत दर्ता गरिसकेकी छन् ।
इन्द्राका अनुसार फागुन १२ गते जन्मिएको शिशुले हालसम्म आफ्नै बाबुको अनुहार समेत देख्न पाएको छैन । उनले प्रेम विवाह गरे पनि सासुले श्रीमानलाई आफूबाट टाढा राखेको र घरमा प्रवेश गर्न नदिएको गुनासो गरेकी छन् ।
उनले विवाहको समयमा दुवैजना नाबालिग रहेको र कानुनी प्रक्रिया सहज नभएकाले केही समय भारतमा बसोबास गरेको बताएकी छन् । त्यसक्रममा सासुले श्रीमानलाई बहाना बनाएर भारतबाटै अलग राखेको र त्यसपछि हालसम्म सम्पर्कविहीन बनाएको आरोप लगाएकी छन् ।
श्रीमान् नफर्किएपछि घर पुग्दा आफूलाई “तल्लो जातकी” भन्दै अपमानित गरिनुका साथै घरमा प्रवेश गर्न नदिइएको उनले बताएकी छन्। उनले श्रीमान् आफूलाई माया गर्ने भए पनि परिवारको दबाबमा परेको र हाल अवस्थासमेत अज्ञात रहेको दाबी गरेकी छन् ।
प्रहरीले घटनाबारे थप अनुसन्धान भइरहेको जनाएको छ । जातीय विभेद तथा अमानवीय व्यवहारजस्ता संवेदनशील विषयमा कानुनी प्रक्रिया अगाडि बढाइएको र अन्य संलग्न व्यक्तिको भूमिकासमेत अनुसन्धानको दायरामा ल्याइने बताइएको छ ।
यस घटनाले समाजमा अझै विद्यमान जातीय विभेद, बालविवाह तथा पारिवारिक हिंसाका समस्या उजागर गरेको छ । सरोकारवालाहरूले यस्ता घटनाको अन्त्यका लागि प्रभावकारी कार्यान्वयन र पीडितलाई न्याय सुनिश्चित गर्नुपर्ने आवश्यकता औँल्याएका छन् ।
